Kərim Benzemanın gələcək taleyi ilə bağlı yeni xəbərlər var.

"Football-plus.az"ın məlumatına görə, müasir futbolun ən tanınmış forvardlarından olan, 2022-ci ildə “Qızıl top”u qazanan və yavaş-yavaş karyerasının qürub çağına qədəm qoyan 36 yaşlı fransalı futbolçu ötən yaydan bəri Səudiyyə Ərəbistanı təmsilçisi “Əl-İttihad”ın şərəfini qoruyur. Amma onun Yaxın Şərqdə işləri heç də qaydasında getmir. Benzema ötən ilin sonlarına yaxın Kriştiano Ronaldonun şərəfini qoruduğu “Əl-Nəssr”ə qarşı oyundakı (2:5) zəif performansının ardından yerli fanatlar tərəfindən çox sərt tənqid atəşinə tutulmuşdu. O, həmin tarixdən sonra bağladığı 76 milyonluq “instaqram” səhifəsini hələ də açmayıb.

Yeni il ərəfəsində başını götürüb istirahətə qaçan Benzema hazırlıq dönəminə bir neçə gün gec qoşulduğu üçün “Əl-İttihad”ın məşqçilər korpusu ilə də problem yaşadı. O, güclü yağış üzündən istirahət etdiyi Mavrikiya adasında ilişib qaldığını bildirsə də, baş məşqçi Marselo Qalyardo buna inanmadı. Nəticədə komanda BƏƏ-yə təlim-məşq toplanışına Benzemasız yollandı. Bundan sonra isə məşhur futbolçunun “Əl-İttihad”ı tezliklə tərk edəcəyi ilə bağlı çoxlu söz-söhbət yayıldı. Onun gah “Çelsi”yə, gah “Lion”a, gah “Real”a keçəcəyi, gah da “Əl-Nəssr”ə, yəni Ronaldonun yanına yollanacağı iddia edildi. Amma zaman göstərdi ki, bu şayiələrin heç biri reallığa uyğun deyil. “Real” Benzemanı qaytarmaqda maraqlı deyil. “Çelsi” daha gənc futbolçu axtarışındadı. “Lion” Kərimin məvacibini qarşılamaq gücündə deyil. Onun “Əl-Nəssr”ə keçidinə isə “Əl-İttihad” rəhbərliyi qətiyyən yol vermək istəmir. Bu üzdən qeyri-adi bir şey baş verməsə, Benzema mövsümün sonuna qədər elə indiki klubunda qalacaq. Bu xəbəri jurnalist David Orşteyn paylaşıb. “Ekip” nəşrinin yazdığına inansaq, Benzema “Əl-İttihad” rəhbərliyindən heyətin gücləndirilməsini tələb edib. Nqolo Kantedən başqa heç kimlə ünsiyyəti olmayan və komandada özünü tənha hiss edən superulduz “Əl-Nəssr”də olduğu kimi hər mövqeyə ulduz futbolçuların cəlb olunmasını istəyir.

Qeyd edək ki, Benzema bu mövsüm 20 rəsmi oyunda 12 qol, 5 məhsuldar ötürməlik performans sərgiləyib. Onun “Əl -İttihad”la müqaviləsinin müddəti 2026-cı ilin iyununa qədər nəzərdə tutulub. Səudiyyə Ərəbistanının ikinci böyük şəhəri olan Ciddəni təmsil edən “Əl-İttihad” daxili çempionatda 18 oyuna cəmi 28 xal toplayıb və hazırda bir oyun az keçirməklə lider “Əl-Hilal”dan 25 xal geridədi.