Hər dəfə ölkə çempionatında mübarizənin indi yalnız 2-ci yer uğrunda – həm də amansız şəkildə! – getdiyini xatırlatmağa dəyməz.

Necə deyərlər, kor-kor, gör-gör, azca aşağı boylansaz, turnir cədvəlindəki durumu görəcəksiz. Ona görə də “kim “Qarabağ”a “əlcək atacaq” sualını bir kənara buraxıb, konkret 20-ci turla bağlı ən önəmli məqamları gözdən keçirməliyik.

Qış fasiləsinə 3-cü pillədə yollanan “Neftçi” indi artıq 2-ci yerdədi və istəsək də, istəməsək də, bu tərəqqi məhz Miodraq Bojoviçin adı ilə bağlıdı. “Ağ-qaralar” hər nə qədər “Qəbələ”dən aşkar üstün təsir bağışlamasa da, onların oyununda əvvəlki pərakəndəlikdən və xaosdan əsər-əlamət qalmayıb. Artıq ehtiyat oyunçular skamyasından 3-5 adam yox, yalnız monteneqrolu göstəriş verir. Düzdü, rəqib aşkar autsayder idi, yeni idman direktoru Səbuhi Səfiyarlı hələ “isinmə hərəkətləri edir”, “Neftçi” 2-ci pilləyə “Zirə” ilə “Sumqayıt”ın xal itirməsi sayəsində yüksəldi. Bütün bu şərtlərin hər biri var, ancaq cədvəldəki reallıq ki dəyişmir!

“Kəpəz” özünə gəlib, hətta o dərəcədə ki, “Qarabağ”dan qızıl dəyərində xal almağa da yaxın idi. Amma təcrübə və ayrı-ayrı oyunçuların fərdi ustalığı son nəticədə həlledici oldu. Ağdamlılar izləyiciləri ilə elə fərq yaradıblar ki, çox rahatca bir neçə məğlubiyyəti də gözə ala bilərlər.

20-ci turun maraqlı məqamlarından biri kimi məhsuldarlığın artmasını da qeyd etmək olar. Şükür, bu dəfə qolsuz bitən oyun olmadı. Azarkeşi gündüz çıraqla axtardığımız məqamda elə belə olması yaxşıdı. “Futbolun bəzəyi qoldu” – bunu hansı mütəfəkkir deyibsə, tam “9-luğ”a vurub.

Hə, turun əsas özəlliklərindən biri fərqli xarakterli narazılıqların get-gedə üzə çıxmasıdı. Ötən tur Qəbələdən çətin qələbə ilə dönən “Sumqayıt” “Araz-Naxçıvan”la oyunda xal itirən kimi Samir Abasov ənənəvi ritorikasına sadiq qaldı. Yəni ki biz bu heyətlə yüksək hədəflər uğrunda oynaya bilmərik, iki turnirdən birini qurban vermək lazımdı. Heç şübhəsiz, çoxbilmiş mütəxəssis bununda sabahkı kubok oyunu ərəfəsində “Neftçi”nin başınan altına yastıq qoymaq niyyəti də güdür. Bəzən adama elə gəlir ki, baş məşqçi ilə klub prezidenti Riad Rəfiyev arasında adi kommunikasiya yoxdu, ya da belə durumun imitasiyasını görürük, klubdaxili demokratiya ən üst səviyyəyə qalxıb.

Narazılıqdan söz düşmüşkən, “Zirə”yə tərəf boylanmaq lazım gəlir. Ardıcıl 7-ci oyunda qələbəyə həsrət qalan komandanın baş məşqçisi Rəşad Sadıqov “üsyan bayrağı açdı”. Hətta mən bu üsyanın prinsipini də gördüm: hamıya və hər şeyə qarşı! Rəşad bəy bəlkə də çoxdan ürəyində yığılıb qalan bütün sözləri dilə gətirdi, təkcə hakimlər yox, ümumilikdə futbol idarəçiliyi ilə bağlı inanılmaz dərəcədə kəskin danışdı. Bu son damla idi, yoxsa irəlidə bizi daha dəhşətli narazılıq epizodları gözləyir – bunu deyə bilmərəm. Bildiyim odu ki, mövsümün ikinci yarısı sözün bütün mənalarında maraqlı başlayıb. Ona görə də seyrə davam! Çempionatımızı izləməyə dəyər!

Misli premyer-liqası
3-cü dövrə, 20-ci tur
26 yanvar
Turan Tovuz – Səbail 3:1
27 yanvar
Kəpəz – Qarabağ 1:2
Zirə - Sabah 0:1
28 yanvar
Araz-Naxçıvan – Sumqayıt 1:1
Neftçi – Qəbələ 3:1
1. Qarabağ 20 15 2 3 50-16 47
2. Neftçi 20 9 5 6 24-18 32
3. Sumqayıt 20 8 7 5 21-24 31
4. Zirə 20 8 6 6 13-11 30
5. Səbail 20 7 6 7 27-30 27
6. Araz-Naxçıvan 20 7 6 7 22-23 27
7. Sabah 20 7 5 8 26-22 26
8. Turan Tovuz 20 7 4 9 33-31 25
9. Kəpəz 20 4 5 11 14-32 17
10. Qəbələ 20 4 2 14 13-36 14
Bombardirlər: Olavio Juninyo (Qarabağ) – 14, Aleksandr Ramalinqom (Səbail) – 7, Abdulla Zubir, Yassin Benzya, Hamidu Keyta, Leandro Andrade (hamısı “Qarabağ”), Otto Con (Turan Tovuz), Pedro Nuno (Səbail) – 6.
Növbəti turun proqramı
3 fevral, 15.00. Səbail – Qarabağ
3 fevral, 17.30. Sabah – Turan Tovuz
4 fevral, 15.00. Sumqayıt – Neftçi
4 fevral, 17.30. Qəbələ - Zirə
5 fevral, 15.00. Kəpəz – Araz-Naxçıvan

ORXAN