Xəbər verdiyimiz kimi, AFFA aşağı yaş qrupu yığmalarının baş məşqçiləriylə müqaviləni yeniləməyib. Bu sırada U-19-un çalışdırıcısı Aqil Nəbiyev də var.

Düzdü, qurum təcrübəli mütəxəssisin taleyi haqda rəsmi qərarını açıqlamayıb. Lakin "football-plus.az” bu haqda məlumat əldə edib.

Belə ki, AFFA Aqil Nəbiyevlə müqaviləni yeniləyib-yeniləməməkdə qərarsızdı. Səbəb isə U-19-un ötən il AÇ-2024-ün seçmə mərhələsinin oyunlarını uğursuz nəticələrlə (Bosniya və Hersoqovina - 0:0, Niderland - 1:2, Lüksemburq - 1:2) başa vurmasıdı.

Şər deməsən, xeyir gəlməz. Tutaq ki, AFFA Aqil Nəbiyevlə müqaviləni yeniləmədi. Nə baş verəcək? Belədə təcrübəli mütəxəssis ya "Neftçi", ya da "Səbail"lə danışıqlara başlayacaq. Çünki "ağ-qaralar" bir neçə gündü yeni baş məşqçi Miodraq Bojoviç üçün yerli köməkçi axtarışındadı və ilk "qapısı döyülənlərdən biri" məhz Aqil Nəbiyevdi.

"Dənizçilər"in baş məşqçisi Şahin Diniyev də Aqil Nəbiyevin komandasına faydalı olacağını düşünür. İndi mütəxəssis AFFA-nın onun haqda son qərar verməsini gözləyir.

KƏNAN BAHADIR