“Səbail” – “Zirə”, “Kəpəz” – “Turan Tovuz”, “Qəbələ” – “Sumqayıt” oyunlarında hakim qərarları ilə bağlı narazılıq yaşanıbsa, turun idarəçiliyini qənaətbəxş saymağa dəyməz. Əlbəttə, belə yazmaqla klub rəsmilərinin bütün iradlarına haqq qazandırmaq fikrində deyilik. Onların da öz maraqları var. Sadəcə, “Kəpəz”lə “Turan Tovuz” arasındakı oyunu idarə edən Əli Əliyev oxşar qayda pozuntularını fərqli şəkildə təfsir edirsə, deməli, problem var.

Son turun rəqəmli xarakteristikasına gəlincə, hakimlər 5 oyunda futbolçulara 28 sarı, 1 qırmızı vərəqə göstərdi ki, bu turun səliqəli keçmədiyinə dəlalət edir.

Qarabağ - Araz-Naxçıvan, RAUF ALLAHVERDİYEV
Son çempionla debütantın görüşü turun maraqla gözlənilən oyunlarından idi. Hakim, təbii ki, işinə məsuliyyətli yanaşmalı, onsuz da tez-tez qınaq obyektinə çevrilən idarəçilik mövzusunda futbol ictimaiyyətinə ümid verməliydi. Komandalar onun işini çətinə salacaq oyun tərziylə yadda qalmadı. Əksinə, meydanda intizamlı futbolçular gördük. Düzdü, sürət var idi, lakin kobudluğa səbəb olacaq qədər yox... Ümumiyyətlə, Rauf Allahverdiyev matçı qənaətbəxş idarə etdi, cəmi üç dəfə əlini cibinə atdı. Yəni cəzalandırmağa tələsmədi, futbolçuların rahat oyun sərgiləməsinə imkan verdi. Əsası odu ki, bunu ədalət prinsiplərinə xələl gətirmədən etdi.

Sabah - Neftçi, ƏLİYAR AĞAYEV
Bakı derbisi prinsipial məqamlarla zəngin idi. İlin ilk oyunu olması, "futbol aclığını" doyurmaq istəyən azarkeşlərin həvəsi, nəhayət, hər iki komandanın xala ehtiyac duyması. Bu üzdən ölkənin ən təcrübəli hakimi Əliyar Ağayev vəzifəsini yaxşı icra etməliydi. Demək olar ki, belə də oldu. FİFA referisi bəzi həmkarlarında fərqli nə baş məşqçilərin, nə futbolçuların, nə də azarkeşlərin əsəbiylə oynadı. Lazım olanda hadisələrə müdaxilə edən ədalət təmsilçisi bəzi hallarda qədərində güzəşt etdi. Belədə dinamik, rəqabətli və baxımlı oyunun şahidi olduq. Hənsısa haqsız qərardan da söhbət getmir. Sarı vərəqələrin sayı 6 oldu ki, bunların da döedü “ağ-qaralar”a göstərildi. Hər halda, bu amilə görə Əliyar bəyi qərəzli idarəçilikdə qınamaq olmaz.

Kəpəz - Turan Tovuz, ƏLİ ƏLİYEV
Artıq 4-cü dəqiqədə hesabı açan tovuzlular 9-cu dəqiqədə azlıqda qaldılar. Faiq Hacıyevin Amil Yunanova qarşı kobud “sürüşmə” fəndinin cəzası birbaşa qırmızı vərəqə idi. Baş hakim Əli Əliyev VAR-a baxıb qərar versə də, bu məqam tovuzlu azarkeşlərin kəskin etirazına səbəb oldu. Əsəbləri tarıma çəkən, Ayxan Abbasovun mətbuat konfransında “artıq hakimlərə də qalib gəlmək lazımdı” deməsinə səbəb olan hadisə 50-ci dəqiqəyə təsadüf etdi. 1:1 davam edən oyunda bu dəfə gəncəlilərdən Vüsal Məsiyev “Turan Tovuz”un icarəyə götürdü İsmayıl Zülfüqarlıya qarşı Faiq Hacıyevin “sürüşmə” fəndini təkrarladı. Lakin Əli Əliyev Vüsala sarı vərəqə göstərməklə kifayətləndi və VAR-a baxmağı da lazım bilmədi. Bu qərar bəlkə də oyunun taleyini həll etdi.

Qəbələ - Sumqayıt, KAMAL UMUDLU
Oyunun taleyini bir penalti müəyyənləşdirdi. Kamal Umudlunun VAR-a baxmadan təyin etdiyi penaltini qəbələli futbolçular etirazla qarşıladı. Oyunsonrası açıqlamalarda da bu qərarın haqsız olduğunu, sadəcə, matç zamanı belə mübarizələrin normal olduğunu bildirdilər. Elmar Baxşıyev isə bu məsələdə birbaşa oyunçusu Lukas Afrikonu günahlandırdı, peşəkar futbolçunun belə məqamlarda daha diqqətli rəftar etməli olduğunu dedi. Düzü, epizoda təkrar baxanda penalti qərarının düzgünlüyü barədə danışmaq bir az çətindi. Oyunu izləyən hər kəsin bu haqda fərqli baxışı ola bilər. Oyunda başqa ziddiyyətli məqam olmadı. Ümumilikdə hakimin oyunu orta səviyyədə idarə etdiyini söyləyə bilərik.

Səbail – Zirə, FƏRİD HACIYEV
Gərgin keçən matçda hakim qərarları ilə bağlı etiraz çox oldu. 13-cü dəqiqədə Ruan Renato Rafael Məhərrəmlinin qarşısını kobudluqla kəsdi. Baş hakim müdafiəçini sarı vərəqə ilə cəzalandırdı. Rəşad Sadıqov buna kəskin şəkildə etiraz etsə də, videotəkrarda Renatonun Məhərrəmlinin üzünə dirsək zərbəsi endirdiyinin şahidi olduq. 17-ci dəqiqədə Rafael Utziqin qapıçı ilə üz-üzə qaldığı epizod ofsayd kimi qiymətləndirildi. Lakin həmin hücum mübahisəyə açıq epizoddu. Videotəkrarda ofsayd olmadığı göründü. 80-ci dəqiqədə Adil Nağıyev Rüstəm Əhmədzadənin ayağına qüvvətli zərbə endirdi. VAR hakimi İnqilab Məmmədov Fərid Hacıyevə potensial penalti üçün monitora baxmağı məsləhət gördü. Lakin referi 11 metrlik cərimə zərbəsinin olmadığını söylədi. Bu penalti deyilsə, penaltinin başqa nə cür olduğunu söyləmək çətindi...