"Bu barədə çox danışmışıq. Bundan sonra danışsaq, nə xeyri olacaq ki? Çox üzgünük. Bu iki il ərzində komandaya sevgi, böyük qayğı bəsləmişik. Vəsaitdən danışmıram. Çünki insanlar hər şeyi pula, vəsaitə bağlayırlar. Amma bizim ən çox içimizi acıdan, çəkdiyimiz əziyyət, qayğı, zəhmət, sevgi və daha sonra maliyyə gəlir. Etdiyimiz hər şeyə görə də haqqımızı halal edirik. Bir daha qeyd edirəm: “vəsait xərclədik, heyifsilənirik” söhbəti qətiyyən yoxdu. Çünki bu, ölkəmizin, Şuşamızın, Laçınımızın komandasıdı. Voleybol sevdiyimiz, ömrümüzü verdiyimiz idman növüdü. Təəssüf ki, bu komandanın bizdən başqa heç kimə lazım olmadığını gördük. Hər cür çıxış yolu tapmağa çalışdıq. Heç bir şəkildə komandaya kömək etmək niyyətində olmadıqlarını göstərdilər. Ona görə fikirləşdik ki, voleybolun, idmanın inkişafına bilavasitə cavabdeh olan orqanlara lazım deyilsə, eybi yox, biz gözləyərik. Nə vaxtsa buna dəyər verən şəxslər olanda yenidən fəaliyyətimizi davam etdirərik. Müraciətimiz ötən ayın sonunda olub. Bildirmişdik ki, bu məsələlər həll olunmasa iştirakımızı dayandırırıq. Qərarımızı mətbuat vasitəsilə bildirmişdik. Necə ki, bizim müraciətlərimizə mətbuat üzərindən cavab veriblər. Eyni şəkildə də biz bildiririk. Bundan sonra qəbul edib-etməməkləri özlərinin problemidi. Hər iki klubumuz iştirakını rəsmi şəkildə dayandırıb".