“Neftçi” ilə “Turan Tovuz”un ardından “Sumqayıt” da Türkiyədə toplanışına məğlubiyyətlə başladı.

Dünən Antalyada ilk yoxlama oyununu keçirən “kimyaçılar” Rumıniyanın yüksək liqa təmsilçisi, 21 oyuna 29 xal toplayaraq turnir cədvəlində 7-ci pillədə qərarlaşan "Hermanştadt" ilə qarşılaşdı. Bələk bölgəsində yerləşən "Fanatic" İdman Kompleksinin meydançasında keçirilən oyun Samir Abasovun yetirmələrinin böyükhesablı məğlubiyyəti ilə başa çatdı.

İlk dəqiqələrdən etibarən meydanın mərkəzində topa yiyələnmək uğrunda mübarizə gedirdi. Abasovun komandası topa üstünlüyü ələ alsa da, hücuma çıxmaqda çətinlik çəkirdi. Əsasən də oyunçuların qarşılıqlı anlaşmasındakı problemlər və qeyri-dəqiq ötürmələr buna mane olurdu. Rumıniya təmsilçisində də xüsusi fəallıq hiss olunmurdu.

Demək olar ki, ilk hissədə yaddaqalan heç nə olmadı. İkinci hissədə isə artıq rumıniyalılar fəal idi. Elə bu fəallıq 49-cu dəqiqədə bəhrəsini verdi. Cərimə zərbəsindən qapı qarşısına göndərilən hava ötürməsini komandanın kapitanı Florin Bejan Orxan Sadıqlının qoruduğu qapıdan keçirməyi bacardı. Cəmi üç dəqiqə sonra qapıçının səhvindən sonra sumqayıtlılar növbəti dəfə meydanın mərkəzinə dəvət olundu. Bu dəfə 23 yaşlı portuqaliyalı futbolçu Ruben Fonsekanın cərimə meydançası kənarından vurduğu zərbənin qarşısında Orxan aciz qaldı – 0:2.

Görüşün irəliləyən dəqiqələrində “Sumqayıt”ın futbolçuları qapıya bir kəsərli zərbə belə vura bilmədilər. Əvəzində 82-ci dəqiqədə müdafiəçilərin səhvindən yararlanan rəqib oyunçu Butvan Mihayi növbəti dəfə bizi məyus etdi. Orxan Sadıqlının qapıda olub-olmadığı bilinmirdi. Rəqib oyunçular cərimə meydançası xaricindən qaıya zərbələr endirməklə kifayətlənirdilər. Oyunda başqa qol qeydə alınmadı. 0:3. Beləliklə, digər iki klubumuz kimi “Sumqayıt”ın da ilk hazırlıq matçında məğlubiyyətlə yadda qaldı. Samir Abasovun meydana buraxdığı heyəti təqdim edirik.

Start heyəti: Mehdi Cənnətov, Elvin Bədəlov (k), Erik Sorqa, Masaki Murata, Oktavio Monteka, Murad Xaçayev, Abu Dosso, Səbuhi Abdullazadə, Tresor Mossi, Rövlan Muradov, Roy Kehat.
Ehtiyat oyunçular: Orxan Sadıqlı, Murad Ağamalıyev, Kasimir Ninqa, Kamran Əliyev, Nihad Əhmədzadə, Kamran Quliyev, Ayxan Süleymanlı, Uğur Cahangirov, Nemət Şıxəmirov, Tural Axverdiyev, Sənan Muradlı, Nadir Orucov.

Xatırladaq ki, “kimyaçılar” yanvarın 16-da növbəti hazırlıq matçını Özbəkistanın “Soqdiana” klubuna qarşı keçirəcək.

KAMAL SƏFƏR