Gəncə Azərbaycan futboluna ən çox oyunçu bəxş etmiş iki şəhərimizdən biridi. Burda həmişə böyük potensial, futbol sevgisi olub. Rəhmətlik Konstantin Abramenko özündən söz etdirməyi bacarmış neçə-neçə oyunçunu torpağın, asfaltın üstündə yetişdirib.

Amma futbolumuza böyük pullar yatırılandan sonra sanki Gəncədə bu sahə tarixin arxivinə köçdü. Uşaq futbolu faktiki məhv oldu. Birvaxtlar "Kəpəz"in əsas heyətinə hər mövsüm, hər mövqeyə yeniyetmələr cəlb olunurdu, hər il saysız-hesabsız istedadlı futbolçu yetişirdi. İndi "Kəpəz"in heyətinə göz gəzdirəndə şəhərdə uşaq futbolunun durumunun nə qədər acınacaqlı olduğunu anlayırsan.

AFFA uzun sürən tənqidlərdən sonra Gəncədə uşaq futbolunun inkişafı yolunda kiçik də olsa, bir addım atıb. Federasiyanın prezidenti Rövnəq Abdullayev "Kəpəz" Futbol Akdemiyasının açılışında şəxsən iştirak etmək istəyirdi. Amma bütün hazırlıqlar son anda rəsmi versiyaya görə, Rövnəq müəllimin səhhətində yaranan problem üzündən yarımçıq qaldı, açılış təxirə salındı.

Etiraf etmək lazımdı ki, Rövnəq Abdullayev AFFA prezidenti olandan sonra futbolumuza çoxlu maliyyə yatırılıb. Heyf ki, heç bir effekti yoxdu. Neft sahəsini gözəl bilən Abdullayev SOCAR rəhbəri kimi bəlkə də uğurlu kadr idi. Amma AFFA-da hər addımda Elxan Məmmədov və Elşad Nəsirov ilə məsləhətləşmələrin sonu yaxşı görünmür. Gəncədə akademiyanı bəlkə də AFFA prezidenti yox, ölkə prezidenti açacaq. Və ya AFFA-nın yeni prezidenti...

Rəsmi versiyaya inansaq, Rövnəq müəllimin səhhəti uşaq futbolu ilə bağlı AFFA-nın gördüyü nadir bir işdən sonra pisləşib. Burda bəlkə də ilahi bir mesaj var. Futbol mütəxəssisləri, jurnalistlər illərdi Azərbaycan futbolunun inkişafının uşaq futbolunun möhkəm təməlləri olmadan mümkünsüzlüyünü vurğulayır. Bugünəcən deyilənlər, yazılanlar qulaqardına vurulur, böyük futbolda milyonlar dağıdılır, yeyilir.

Bəlkə xeyirlisi budu. AFFA-nın yeni rəhbəri inkişaf strategiyasını uşaq futbolundan qurmalıdı. İkinci bir variant mümkün deyil!

ANAR ŞABANOĞLU