"Gələcəkdə komandamızın yaxşı çıxış etməsi üçün daim çalışmaq, belə yarışlarda daha çox iştirak etmək lazımdı. Həmçinin gənclərin inkişafı üçün addımlar atılmalıdı. Voleybol Federasiyası bu istiqamətdə böyük işlər görür. Bizə şərait yaradıb, dəstək olub, hər cür kömək göstərir. Komanda həm AVF-ni, həm də Gənclər və İdman Nazirliyinin voleybol mərkəzində təlim-məşq toplanışları keçmişdi. Uşaqların çoxu belə turnirlərdə iştirak etmədikləri üçün psixoloji çətinlik yaranırdı. Mən məşqlərdə də bu barədə düşünürdüm. Ona görə də belə halları aradan qaldırmaq üçün həftədə iki dəfə yoldaşlıq oyunları keçirirdik. Qələbə qazana bilməsək də, komandamız həqiqətən mübarizə apardı. Hətta EEVZA nın prezidenti belə bildirdi ki, Azərbaycan hələ belə yaxşı komanda gətirməyib. Oyunumuzu çox bəyəndilər. Biz hər oyundan sonra iclas edib rəqib komandanın zəif və güclü tərəflərini müzakirə edirdik. Özümüzdə olan səhvləri təhlil edir, aradan qaldırmağa çalışırdıq".