“Real” Superkubokun finalında ötən il “Barselona”dan aldığı məğlubiyyətin əvəzini amansızcasına çıxdı.

Oyuna möhtəşəm başlayan madridlilər artıq 10-cu dəqiqədə iki top üstünlüyü yaxaladı. “Barsa”nın müdafiə xəttinin kobud səhvlərindən yararlanan Vinisius dubl etdi. Debütdəki aşkar fiaskodan sonra tədricən özünə gələn kataloniyalılar 33-cü dəqiqədə Levandovskinin sayəsində qollardan birinin əvəzini çıxdı. Ancaq Ançelottinin komandası bu qola da yaxşı reaksiya verdi və dərhal iki top fərqini bərpa etdi. Vinisius özü qazandığı penaltini dəqiq yerinə yetirməklə ilk yarını het-triklə bitirdi. Xavinin komandası 1:3-dən sonra təşəbbüsü ələ ala bilmədi. Əvəzində madridlilər 2-ci hissənin gedişində hesab arasındakı fərqi darmadağın həddinə çatdırdı. “Barsa”nın çoxsaylı problemlərinə 2-ci hissənin ortalarında – 71-ci dəqiqədə Arauxonun meydandan qovulması da əlavə olundu, ancaq madridlilər say üstünlüyündən yararlana bilmədi. Tarixində 13-cü dəfə Superkuboku qazanan “Real” bu turnirdə qələbə sayına görə “Barselona”dan (14) geriliyi minimuma endirdi.

Real – Barselona 4:1
Real: Lunin, Karvaxal, Rüdiger, Naço, Mendi, Valverde (Sebalyos, 86), Çuameni, Kroos (Modriç, 81), Bellingem (Xoselu, 86), Rodriqo (Dias, 77), Vinisius (Kamavinqa, 82).
Barselona: Penya, Arauxo, Kunde, Kristensen, Balde, Roberto (Lopes, 61), Gündoğan, De Yonq, Pedri (Yamal, 61), Torres (Feliş, 61), Levandovski.
Qollar: Vinisius, 7 (1:0). Vinisius, 10 (2:0). Levandovski, 33 (2:1). Vinisius, 39-p. (3:1). Rodriqo, 64 (4:1).
Vərəqələr: Arauxo, 37. Roberto, 38. Bellingem, 42. Rüdiger, 62 - sarı. Arauxo, 71 – qırmızı (2-cı sarı).
Hakim: Xuan Munera (Benidorm).
14 yanvar. Ər-Riyad. 23977 tamaşaçı.

Faktlar
* “Real” şəxsi oyunlarda qələbə sayına görə “Barsa” ilə aradakı fərqi artırdı. Madridlilər rəsmi oyunlarda 104-cü dəfə qələbə qazandısa, kataloniyalıların 100 belə qələbəsi var. Komandalar daha 52 dəfə heç-heçə edib. Top fərqi də “Real”ın xeyrinədi - 430:417.
* Ançelotti “Real”ın “sükanı arxasında” titul sayına görə Zidana çatdı. Hər iki mütəxəssisin hesabında 11 qənimət var. “Real” tarixinin ən titullu məşqçisi isə Migel Munyosdu – komanda onun rəhbərliyi arasında 14 qənimət qazanıb.
* Florentino Peres artıq “Real” tarixinin ən titullu prezidentidi. Superkubokun finalındakı qələbədən sonra onun titullarının sayı 33-ə çatdırdı. Əvvəlki rekord (32) əfsanəvi Santyaqo Bernabeuya məxsus idi.
* Vinisius “Barsa”nın qapıçısına üç dəfə yol tapdı – 7-ci, 10-cu və 39-cu dəqiqələrdə. 23 yaşlı braziliyalı sonuncu dəfə 2022-ci ilin yazında het-trik etmişdi: mayın 12-də “Levante”nin darmadağınına (6:0) üç qolla töhfə vermişdi. Braziliyalı ulduz 21-ci əsrdə “el-klasiko” tarixinin ən sürətli het-trikinin müəllifi oldu. Bundan başqa, o, bu duellərin tarixinə artıq ilk yarıda het-trik etməyi bacaran 5-ci futbolçu kimi düşdü.
* Vinisius “Barsa” ilə oyunda dublu 9 dəqiqə 48 saniyəyə reallaşdırdı. “El-klasiko”da yalnız Hari Lineker bunu daha tez bacarıb. 1986/87 mövsümündə “blauqrana”nın şərəfini qoruyan ingiltərəli bombardir 4 dəqiqə 48 saniyəyə dubl edib.
* “Barselona” “Real”a qarşı keçirdiyi son üç oyunda uduzub. Xavinin komandası son finala qədər ötən il La Liqada (28 oktyabr – 1:2) və ölkə kubokunda (5 aprel – 0:4) də uduzub. Son üç oyunun ikisində darmadağın qeydə alınıb. Maraqlıdı ki, bu seriyaya qəədər olan üç oyunun hamısında “Barsa” qələbə qazanmışdı.

Oyundan sonra
Karlo Ançelotti, “Real”ın baş məşqçisi: “Oyun bizim üçün çətin alındı. “Barselona”nın oyununu nəzərə alsaq, 4:1 hədsiz böyük hesabdı. Hesab 3:1 olarkən meydanda bərabər oyun gedirdi, yalnız 4-cü qoldan sonra rəqib əlini yanına saldı. Bəlkə də 2:0-dan sonra əks-hücumlara çox həvəs göstərdik, topa daha yaxşı nəzarət etməliydik. Mən ehtiyat hakimlə 2-ci hissəyə dəqiqə artırmaqla bağlı danışmadım, sadəcə, ehtiyatlı olmağı tapşırdım, ona görə, oyun əsəbi xarakter almışdı, bunu anlamaq lazım idi. Vinisiusa ən yaxşı səviyyəsinə qayıtmaq üçün cəmi iki-üç oyun bəs etdi. Dabanla oyunu bəyənmirəm. Vinisius da belə etdi, Bellingem də - xoşuma gəlmədi”.

Xavi Ernandes, “Barselona”nın baş məşqçisi: “Böyük ümidlərimiz var idi, entuziazmla doluyduq, ancaq ən pis oyunumuzu keçirdik. Oyuna çox pis başlasaq da, ardından bir qolun əvəzini çıxdıq, ancaq 1:3-dən sonra hər şey bizim üçün çətinləşdi. “Real” əks-hücumlarla bizə ciddi zərbə vurdu, biz onları dayandıra bilmədik. Bu gün futbolun acı üzünü daddıq. Fanatlardan üzr istəyirəm, rəqiblə mübarizə aparmaq bizim üçün çətin idi. Karyeramda çoxlu məğlubiyyət olub, ancaq son nəticədə özümüzə gəlmişik. “Barselona” qayıdacaq. Qoy bu oyun daha yaxşı olmaqda bizə yardım etsin. Bizi çətin günlər və çoxlu tənqid gözləyir, etiraf etməliyik ki, final üçün zəruri olan səviyyədə deyildik. Ayağa qalxaq və qalan titulların arxasınca gedək”.

Vinisius Junior, “Real”ın hücumçusu (“Barsa”nın ehtiyat oyunçular skmyasında əyləşənlərə əli ilə 4:1-i işarə etməsi haqda): “Bu tituldan, oyunumuzdan və qollardan çox razıyam. Madriddəki fizioterapevtlərimə, komanda yoldaşlarıma və məşqçi korpusuna təşəkkür edirəm. Onlar məni ən yaxşı formamı bərpa edəcəyimə inandırdı. Meydanda başverənlər orda qalır. Ançelotti həmişə mənə yardım etməyə hazırdı. Hər oyunda öyrənirəm. Mən daha yaxşı oynamaq, həmçinin komanda naminə fədakarlıq etmək istəyirəm. Hər kəsin mənlə mübahisə etmək istəyi mnədə kədər doğurur, onlar bilir ki, media dərhal bu haqda yazacaq. Yalnız oyuna, uğur qazanmağa köklənmək istəyirəm. Mən müqəddəs deyiləm. Bəzən hədsiz çox danışıram, yersiz driblinq edirəm, ancaq səhvimi düzəltmək istəyirəm. Ançelotti və komanda yoldaşlarım məni öyrədirlər”.