“Qəbələ” “Araz-Naxçıvan”ı iki dəfə məyus etdi - REPORTAJ
Son günlər ölkə ərazisində hava şəraiti pisləşsə də, “Qəbələ” ilə “Araz-Naxçıvan” arasındakı yoldaşlıq oyununu təşkil etmək mümkün oldu.
Dünən Qəbələ şəhər stadionunda keçirilən matç hər iki komandanın qış fasiləsindəki sonuncu yoxlama oyunu idi. Buna qədər “Qəbələ” “Kəpəz”ə (1:2), “Araz-Naxçıvan” isə “Zirə”yə (1:2) uduzmuşdu. Bu dəfə iki qol vuruldu. 14-cü dəqiqədə Əyyub Allaşın, 57-ci dəqiqədə Samuel Tettehin vurdğu qollar “Qəbələ”yə qələbə qazandırdı. Beləliklə, Azər Bağırovun komandası qış fasiləsini məğlubiyyətlə başa vurdu. Elmar Baxşıyevin yetirmələri isə ikinci yarı ərəfəsində əhval-ruhiyyəsini yüksəltdi. Oyunu canlı izləmək şansımız olmasa da, baş məşqçilərin meydana buraxdığı ilk “11-lik” belə olub.
Qəbələ: Kristof Atanqana, Murad Musayev, Lukas Afriko, Urfan Abbasov, Nicat Əliyev, Gilad Abramov, Emil Səfərov (k), Əyyub Allaş, Samuel Tetteh, Bilel Auaşeriya, Osama Xalayla.
Araz-Naxçıvan: Kristian Avram, Turan Manafov, İqor Ribeyro, Numan Kurdiç (k), Abdulla Rzayev, Vadim Abdullayev, Mohammed Kadiri, Tural Bayramlı, Miço Kuzmanoviç, Nuno Rodriges, Elvis Maşike.
Oyundan sonra hər iki komandanın baş məşqçisi fikirlərini bölüşüb.
Elmar Baxşıyev, “Qəbələ”:
“Mövsümün ikinci yarısının hazırlıq prosesinə yanvarın 4-də start vermişdik. Təlim-məşq toplanışı əvvəlcədən planlaşdırdığımız proqram üzrə keçdi. İstədiklərimizi hazırlıq prosesində gerçəkləşdirə bildik. Öncədən nəzərdə tutduğumuz kimi iki yoxlama oyununa çıxdıq. Premyer-liqa klubları “Kəpəz” və “Araz-Naxçıvan”la qarşılaşdıq. Toplanışın gedişindən razı qaldım. Bu hazırlığın nəticəsini mövsümün ikinci yarısında görə biləcəyik. Komandamızın potensialı var. Düşünürəm ki, daha yaxşı və daha iddialı “Qəbələ” görəcəyik. Keçirdiyimiz yoxlama oyunlarında gənc futbolçulara şans verdim. Onların çıxışından razı qaldım. Bu oyunçular gələcəkdə komandamıza əlavə güc qatacaq”.
Azər Bağırov, “Araz-Naxçıvan”:
"Hazırlıq prosesi istədiyimiz kimi keçdi, plana uyğun toplanışı başa vurduq. Oyunda da nəyi planlaşdırmışdıqsa, yerinə yetirdik. Hər hissədə fərqli heyətlə oynadıq. Bütün futbolçulara şans verdik, onlar da tapşırıqları yerinə yetirməyə çalışdılar. Bir sözlə, nəticədən asılı olmayaraq, faydalı toplanış və oyun oldu. Ən əsası matçı zədəsiz başa vurduq. Zədə üzündən toplanışa qatılmayan Orxan Əliyevlə İsmail Azzaui Bakıda komandaya qoşulacaq və rəsmi oyunlara qədər tam hazır olacaqlar".
KAMAL SƏFƏR
Digər xəbərlər
