“Öncəliklə siz də daxil olmaqla məsələni diqqətdə saxlayan, bizimlə maraqlanan hər kəsə təşəkkür edirəm. Fürsət düşmüşkən, bütün azərbaycanlıları qarşıdan gələn Həmrəylik Günü və Yeni il bayramı münasibətilə təbrik edirəm. Həmçinin ilk gündən bəri yanımızda olan bütün şəxslərə “Allah razı olsun” demək istəyirəm. Məsələ AFFA-nın prezidenti Rövnəq Abdullayevin birbaşa nəzarətindədi. Hər kəsin qayğısını ilk gündən hiss edirik və bir an belə mənəvi dəstəksiz qalmadıq. Vurğulayım ki, Peşəkar Futbol Liqasının iş rejimində hansısa axsaqlıq yoxdu, hər kəs canla-başla vəzifəsini yerinə yetirir. Elxan müəllimlə müntəzəm əlaqədəyik və tapşırıqları tam icra olunur. Paralel şəkildə Aslan müəllimlə də müzakirələr aparırıq. İnşallah, yaxın günlərdə Sənan bəyi də, Zaur bəyi də iş başında görəcəyik. Bir devizimiz var ki, hər şey daha yaxşı olacaq. Qəzaya uğrayan kollektivin vəziyyətinə gəlincə, şükür Allaha, həkimlərin səyi, insanların duası sayəsində gün keçdikcə yaxşılaşırıq. Bilindiyi kimi, bir müddət “Liv Bona Dea” xəstəxanasında qalandan sonra mən, Zaur Hacı-Məhərrəmov və Sənan Abdullayev evə buraxıldıq. Başa çatan həftənin ilk günündən iş başındayam. Sənan bəy və Zaur bəyin müalicəsi ev, Aslan müəllim və sürücünün müalicəsi Azərbaycanda xəstəxana şəraitində davam edir. Elxan müəllim isə Türkiyəyə yollanıb. Bunun tibbi tərəflərini həkimlər daha yaxşı izah edə bilər. Mən onu deyə bilərəm ki, qəzada xəsarət almış hər kəsin durumu yaxşıya doğru gedir”.