Şaxta Babadan medal, sponsor, 1937 qol istədilər – ANKET-SORĞU
2023-ün son gününü yaşayırıq. Bəs görəsən, ölkə klubları Yeni ildə Şaxta Babadan nə istəyir? Bu sualı mətbuat katiblərinə ünvanladıq.
Anar Hacıyev (Qarabağ):
"Ölkəmiz, xalqımız üçün sülh, əmin-amanlıq, bütün sahələrdə inkişaf diləyirəm. Klubumuz üçün isə iştirak etdiyimiz bütün turnirlərdə yeni uğurlar, yeni rekordlar, ölkəmizi beynəlxalq turnirlərdə layiqincə təmsil etməyi, "Qarabağ" brendinin daha da tanınmasını və xalqımızı daha böyük uğurlarla sevindirməsini arzulayıram".
Süleyman Tağıyev (Turan Tovuz):
"Öncə xalqımız üçün əmin-amanlıq, cansağlığı, xoş günlər arzulayırıq. 2024 futbolumuz üçün düşərli və uğurlarla zəngin olsun".
Zaur Xudiyev (Sumqayıt):
"Klub olaraq, yeni il üçün hədəflərimiz, planlarımız var. Onların həyata keçməsini istəyirik. Şaxta Babadan isə medal istəyirik. Biz qazanmaq üçün hər şey edəcəyik. O da bizə azca dəstək olsa, hər şey əla olacaq".
Asəf Zeynallı (Qəbələ):
"İlk öncə ölkəmiz üçün əmin-amanlıq arzulayırıq. "Qəbələ" üçün isə uğursuzluq zolağından qurtulmaq və mövsümü yaxşı pillədə başa vurmaq istəyirik".
Elnur Həmidov (Sabah):
"Sabah" kollektivi olaraq, növbəti ilin həm klubumuz, həm də bütün ölkə futbolu üçün uğurlarla zəngin, bol sevincli il olmasını arzulayırıq".
Mahal Məmmədov (Araz Naxçıvan):
"Klub üzvləri üçün sağlam can, klubumuz üçün müasir tələblərə cavab verən stadion-baza arzulayıram".
Elmar Abdullazadə (Zirə):
"Ümid edirəm ki, 2024-cü il ölkəmiz, xalqımız üçün uğurlu, sülh və əmin-amanlıq şəraitində keçər. Düzdü, Şaxta Babaya inanacaq yaşımız çoxdan keçib. Amma yenə də gələn il üçün klubumuzdan uğurlu nəticələr, avrokuboklara vəsiqə və ölkəmizi ən layiqli şəkildə təmsil etməyimizi istərdim".
Azad Musayev (Kəpəz):
"Təbii ki, klubumuz üçün sponsor istəyirik. Hazırda ən böyük arzumuz budu".
Rəşad Məmmədov (Səbail):
"2023 xalqımız üçün çox möhtəşəm keçdi. Böyük qələbələr qazandıq, ərazi bütövlüyümüzü təmin etdik. Bu millətin vətəndaş olaraq qürur hissi keçirirəm. Qarşıdan gələn il hamı üçün düşərli olsun. Klub, rəhbərlik olaraq, bacardığımız qədər çalışacıq ki, uğur qazanaq. 2023 başlayandan zədəli futbolçularımız çox oldu. 3-4 futbolçumuz əməliyyat olundu. Azum odu ki, futbolçularımız sağlam olsun. Çünki zədələrlə bağlı böyük problemlər yaşadıq. Yeni ildən həm öz klubumuza, həm də digər komandalara zədələrlə bağlı problem yaşamamasını arzulayıram. Hər kəsə sağlamlıq, ailə səadəti arzulayıram".
Emin Əfəndi (Neftçi):
"2024-də Şaxta Babadan rəqib qapılarına 1937 qol vurmağımızı isyəyirəm".
GÜNAY SÜLEYMANOVA
Digər xəbərlər
