"İrəvan" ölkə kubokunun 1/8 final mərhələsində "Araz-Naxçıvan"a 2:8 hesabı ilə məğlub olaraq turnirdə mübarizəni dayandırıb.

"Football-plus.az" xəbər verir ki, 1-ci liqa təmsilçisinin baş məşqçisi Nazim Süleymanov matçdan sonra keçirilən mətbuat konfransında iştirak edib:

- Komandanız niyə darmadağın oldu?
- Darmadağın deyəndə, hesab onu deyir. Amma matçın əvvəlində heç kim bunu deyə bilməzdi. Premyer-liqa ilə 1-ci liqa arasında səviyyə fərqi göz qabağındadı. İndiki futbol sürət futboludu. Səviyyə öz sözünü dedi. Komanda səbrli və nizamlı olmalıdı. Bizdə oyunçularla bağlı çətinliklər var. Ehtiyatda 5 oyunçu olsa da, 3 nəfəri oyuna buraxa bildik. Qapıçılarla birlikdə 17-18 oyunçumuz var. Liqada bir oyunumuz qalıb. Kubok avrokuboklara ən qısa yoldu. İnsanların arzuları var. İştah diş altındadı. Amma səviyyə öz sözünü dedi. "Araz-Naxçıvan"a uğurlar arzulayıram. Futbol səhvlər oyunudu. Kim çox səhv edirsə, o da məğlub olur. Təssüf ki, biz çox səhv etdik.

- Oyundan sonra futbolçulara nə dediz?
- Təbrik elədim. Dedim ki, eybi yox, yeni tarix yazdız. Çempionatdakı son matçdan sonra gələcəklə bağlı planlar quracağıq.