“Aşağılar”ın ortaq fikri: elitaya müqavimət göstərmək çətindi!
Yeni futbol mövsümündə kubokun görkəmi dəyişib.
Belə ki, artıq 2-ci liqa təmsilçiləri də turnirdə iştirak etdi. Yarımpeşəkar liqanın təmsilçilərindən "Baku Sportinq"i çıxmaq şərtiylə qalanları elita komandalarıyla oyunda darmadağınla üzüldü. "Kür-Araz" "Araz-Naxçıvan"a, "Lerik" "Sumqayıt"a, "Şəfa" "Səbail"ə, "Göygöl" "Turan Tovuz"a, böyük hesabla uduzdu. Bəs bu klublar premyer-liqa təmsilçiləriylə matçlarda nə gördü, nə götürdü? Saytımızda “Şəfa”nın baş məşqçisi Əli Əliyevin fikirlərinə yer ayırmışdıq. Bu dəfə daha üç komandanın baş məşqçisinin fikirlərini öyrəndik.
Araz Mansurov (Göygöl):
"Elita komandasına qarşı oynamaq çox çətindi. "Turan Tovuz"da premyer-liqa yetərincə güclü klubdu. Təbii ki, çempionatlar arasında səviyyə fərqi göz önündədi. Amma biz rəqibdən çəkinmədik. Oyundan öncə futbolçularımla söhbət etdim. Onlara dedim ki, nəticənin necə olacağından asılı olmayaraq, çıxın meydanda bacarığınızı göstərin. 5:1 hesabıyla məğlub olsaq da, futbolçularım yaxşı mübarizə apardı. Güclü Tovuz təmsilçisiylə matç bizim üçün yaxşı praktika oldu".
Ələmdar Mustafayev (Kür-Araz):
"1-ci və 2-ci liqa komandalarının ölkə kuboku uğrunda yarışlara qoşulması futbolumuz üçün çox əlamətdar bir hadisə kimi qiymətləndirmək olar. Kubok yarışında fərqli atmosferin şahidi olduq. Premer-liqa klubu ilə qarşılaşmaq komandamız üçün çox böyük təcrübədi. Məğlub olsaq da, ruhdan düşmədik. Bu hal növbəti oyunlarda daha yaxşı göstəricilər qazanmağımıza müsbət təsir göstərəcək".
Vidadi Hüseynov (Lerik):
"Əvvəlcədən necə güclü rəqibə qarşı oynayacağımızı bilirdik. Qarşılaşmanın da bizim üçün ağır keçəcəyi gözlənilən idi. Bu matça yoxlama matçı kimi də yanaşırdıq. Ən azı güclü rəqiblə oynamaqla hansı mövqelərdə axsaqlıqların, çatışmazlığın olduğunu gördük. İlk dövrənin bitməsi ərəfəsində yaxşı təcrübə oldu. Artıq hansı mövqelərə oyunçu cəlb edəcəyimizi bilirik. "Sumqayıt"la matç bizə çox faydalı oldu. Yeganə xoşagəlməz hadisə rəqib futbolçu Velinovskinin zədələnərək sıradan çıxması oldu. Buna görə məyusuq. Qalan hər şey yaxşı idi".
ABDULLA İSMAYILOĞLU
Digər xəbərlər
