Oyundan iki gün əvvəl 18700, bir neçə saat əvvəl isə artıq 23 min biletin satılmasıyla bağlı xəbər yayıldığından “Bəhramov”un tribunalarının dolub-daşacağını gözləyirdik.
Elə oyunu TV ilə izləyənlər də çoxlu boş yer gördü. Protokolda isə 28515 rəqəmi yazıldı. Görəsən, bu qədər boşluqların səbəbi nə idi? Bunu öyrənmək üçün “köhlən atlar”ın əsas azarkeş qrupu olan “İmarət Tayfa”nın üzvlərindən Elnur Quliyevin fikirlərini öyrəndik:
“Stadionun dolmamasının əsas səbəbi işin düzgün qurulmamasıdı. Başqa ölkələrdə 2-ci liqada belə stadion dolur. Söhbət biletin qiymətindən və ya maddiyyatdan getmir. Hər ay Bakıda konsertlərə külli miqdarda pul xərclənir. Orda biletlər 50-700 manat arası dəyişir. Deməli, futbol oyunlarına bilet satışı doğru aparılmır. “Qarabağ”ın pley-off oyununun Bakı Olimpiya Stadionunda keçirilməsini istəməzdim. O stadion bizə düşərli deyil. Orda keçirdiyimiz oyunlar daha çox uğursuzluqla nəticələnib. Azarkeş olaraq, yolu bizə çətindi. Get-gedə fanat kütləsi üçün futbola stadiondan baxmaq maraqsızlaşır. Müxtəlif yollarla insanları cəlb etmək lazımdı. Biz həmişə təkliflərimizi irəli sürməyə hazırıq. Təbii ki, təklif heç nəyi dəyişmir, bu uzun sürən prosesi həyata keçirən, üzərində işləyən adamlar lazımdı”.
GÜNAY SÜLEYMANOVA