Xəbər verdiyimiz kimi, Azərbaycanın futzal yığması dünən DÇ-2024-ün elit mərhələ oyununda evdə Rumıniya ilə heç-heçə etdi – 5:5.

Rəqibin baş məşqçisi Endre Kaço oyundan sonra dedi ki, Azərbaycanın hələ də şansı qalır. Təbii ki, bunlar gəlişigözəl söz idi, daha doğrusu, başaldatma və yalan. İndi məsələni anladacağıq. Əvvəlcə turnir cədvəlindəki duruma nəzər yetirək:

1. Qazaxıstan 5 5 0 0 15-7 15

2. Niderland 5 2 0 3 11-10 6

3. Rumıniya 5 1 1 3 11-20 4

4. Azərbaycan 5 1 1 3 16-16 4

Lap tutaq ki, Azərbaycan son turda səfərdə Niderlanda qalib gəlir və xalını 7-yə çatdırır. Belədə avtomatik qalan 4 qrupdakı vəziyyətə baxmaq lazımdı. Baxaq da, işimizin adı nədi!

B qrupu

1. Polşa 5 4 0 1 18-9 12

2. Ukrayna 5 3 1 1 1 27-9 10

3. Serbiya 5 1 2 2 9-15 5

4. Belçika 5 0 1 4 10-31 1

C qrupu

1. Fransa 5 4 1 0 24-10 13

2. Xorvatiya 5 3 0 2 16-8 9

3. Slovakiya 5 1 1 3 12-22 4

4. Almaniya 5 1 0 4 10-22 3

D qrupu

1. İspaniya 5 4 1 0 16-2 13

2. İtaliya 5 2 1 2 14-14 7

3. Sloveniya 5 2 1 2 8-11 7

4. Çexiya 5 0 1 4 4-10 1

E qrupu

1. Portuqaliya 5 5 0 0 27-2 15

2. Finlandiya 5 3 0 2 16-10 9

3. Ermənistan 5 1 0 4 5-20 3

4. Gürcüstan 5 1 0 4 3-19 3

İndi də ümumi reqlamentə baxaq. Gələn il 14 sentyabr – 6 oktyabr aralığında Özbəkistanda keçiriləcək dünya çempionatına Avropadan 7 yer ayrılıb. Yuxarıdakı cədvəllərdən göründüyü kimi, Qazaxıstan, Fransa, İspaniya və Portuqaliya DÇ-yə vəsiqəni təmin edib. D qrupundakı lider Polşanın 12, 2-ci yerdəki Ukraynanın 10 xalı var. Bu komandalardan biri (Polşa – Ukrayna oyunu dekabrın 20-də keçiriləcək) son turun ardından Avropa üçün ayrılan 5-ci vəsiqəyə yiyələnəcək. Polşa – Ukrayna oyununda uduzan da ən yaxşı nəticələrə malik 2-ci komandalardan biri kimi pley-off oyunlarına qatılacaq. 5 qrupdan 2-ci yeri tutanlar arasında ən yaxşı nəticələrə malik 4 komanda dünya çempionatına qatılmaq üçün bir-biri ilə qarşılaşacaq. C qrupunda Xorvatiyanın, E qrupunda isə Finlandiyanın 9 xalı var, yəni bu komandalara çatmaq şansımız yoxdu.

Bəs gözümüzü hara və ya nəyə dikmişik? Yalnız və yalnız D qrupuna. İtaliyanın da 7 xalı var, Sloveniyanın da. Dekabrın 20-də Sloveniya Çexiya ilə səfərdə, İtaliya İspaniya ilə evdə qarşılaşacaq. İtaliya ilə Sloveniyadan birinin 1 xal qazanması kifayət edir ki, Azərbaycanın Niderland üzərində mümkün səfər qələbəsi heç bir işə yaramasın. Odu ki, dostlar hər şeyi öz adı ilə çağırmaq, xalqa həqiqəti demək lazımdı. Bizim DÇ-yə qatılmaqla bağlı heç bir şansımız qalmayıb! Kaço, camaatı aldatma, o şansla bağlı nağılları gedib Rumıniyada nəvə-nəticənə danışarsan!

HUŞƏNG