Srağagün axşam saatlarında ölkəmizdə, xüsusən Nərimanov rayonunun ərazisində futbol bayramı idi. Çünki "Qarabağ" onu Avropa Liqasının pley-offuna aparan oyunu keçirəcəkdi. Rəqib isə xalsız "Həkken" idi.

Azarkeşlər oyuna saatyarım qalmış Tofiq Bəhramov adına stadionun yolunu tutmuşdu. Demək olar ki, hər kəsin sifətində arxayınlıq və təbəssüm var idi. Bu da futbolsevərlərin baş məşqçi Qurban Qurbanova və komandasına inamından irəli gəlirdi.

Başda "İmarət Tayfa" və "Qarabağ ordu" fanklubları olmaqla bütün tərəfdarlar yerində idi. Tribunalarda yalnız bahalı VİP oturacaqlar, demək olar ki, boş qalmışdı. Nəhayət, gözlənilən an gəlib çatdı və hakimin start fitini eşitdik. Soyuq və çiskin yağışlı havada özünü və yerini isitməyə macal tapmayan azarkeşlər düz 44-cü saniyədə ayağa qalxdı. Çünki rəqib qapıçını kobud səhvindən sonra hesab açıldı. Erkən qol hamını xoşbəxt etdi. "Qarabağ"ın hissənin sonunda ikinci dəfə rəqib torunu silkələməsi çılğın azarkeşləri daha da ayaqlandırdı. Onlar ikinci hissədə də yorulmaq bilmir, sanki futbolçularla birgə meydanda çıxış edirdi. Burda sözün həqiqi mənasında "12-ci oyunçu"nun vacibliyini hiss etdik.

Qurban Qurbanovun həyəcanlı duruşu, fürsət düşdükcə oyunçulara göstəriş verməsi, xüsusilə Lunyovla maraqlanması gözdən yayınmadı. O, komandasının səhvə yol verdiyi epizodlarda da dəstəyinə əsirgəmir, alqışla futbolçiları motivasiya edirdi. Baş məşqçi əvəzlədiyi Yankoviçin əlini sıxdısa, Juninyonu qucaqladı. Veşoviçin “qırmızı”sını da anlayışla qarşıladı. Demək olar ki, bu andan sonra azarkeş dəstəyi daha da artdı. Çünki məhz indi "12-ci oyunçu" olmağın vaxtı idi. Son dəqiqələrdə tərəfdarların coşqusunu izlədik. Onlar avtoqol müəllifi olan Bədavini belə alqışlarla yola saldı. Alban Yucin Caya final fitini səsləndirməsinə az qala peşman oldu. Axı o, fitini səsləndirən kimi stadion ətrafında atəşfəşanlıq başladı, gənc və təcrübəsiz referi istər-istəməz diksindi.

Sonrakı dəqiqələrdə futbolçular meydanda dövrə vurub azarkeşlərə təşəkkür etdi və “İmarət Tayfa”nın qarşısında dayandı. Maksim Medvedev “Qarabağ”ın bayrağını dalğalandırdı. Maraqlıdı ki, bütün bunlar yaşanarkən Qurban Qurbanov telefonla danışırdı. Sonra məlum oldu ki, zəng edən Zaqatalanın icra başçısıymış... Azarkeşlər yollarda da “Qarabağ”ın adını səsləyir, qələbəni qeyd edirdi...

Ümumiyyətlə, cümə axşamı möhtəşəm gecə yaşandı, sözül əsl mənasında müdhiş hisslər yaşadıq. Bütün bunlara görə təşəkkürlər, Qurban Qurbanov, təşəkkürlər, “Qarabağ”!

KƏNAN BAHADIR