“Səbail”in işığı birdəfəlik sönüb?!
Yox-yox, qətiyyən “Səbail”in çempionatdakı son uğursuzluqlarına işarə etmək niyyətində deyilik. Məsələ başqadı.
Srağagün PFL-in saytında yer alan bir məlumat diqqətimizi çəkdi:
"ASCO Arena"nın işıqlandırma sistemində bir müddət öncə yaranmış problemə görə təmir-bərpa işləri hələ də davam etdiyi üçün Misli Premyer Liqasının 17-ci turunun “Səbail” və “Qəbələ” komandaları arasında baş tutacaq oyununun vaxtı dəyişdirilib. “Səbail” klubunun vəziyyətlə bağlı yenilənmiş müraciətinə əsasən “Qəbələ” klubu PFL tərəfindən məlumatlandırlıb. PFL-in yekun qərarına əsasən oynanılması əvvəlcədən 17.00-da nəzərdə tutulmuş görüşün gün və məkan eyni saxlanılmaq şərti ilə saat 13.00-da baş tutmasıına qərar verilib”.
Göründüyü kimi, “Səbail” rəhbərliyi 14-cü turun noyabrın 25-də keçirilən “Kəpəz”lə ev oyunu ərəfəsində olduğu kimi, yenə çempionatı keçirən quruma müraciət edib, mədət umub. “Dənizçilər” “ASCO Arena”da projektor işığı altında sonuncu dəfə noyabrın 3-də “Turan Tovuz”la qarşılaşıb və həmin vaxtdan bəri gün işığına möhtacdı. Hələ noyabrın 22-də qəzetimizə açıqlama verən “Səbail”in mətbuat xidmətinin rəhbəri Rəşad Məmmədov problemin stadionu işıqlandıran transformatordakı nasazlıdan qaynaqlandığını, bir neçə günə həllini tapacağını demişdi. “Səbail”in builki sonuncu oyununu dekabrın 23-də Sumqayıtda keçirəcəyini nəzərə alsaq, belə çıxır ki, işıq probleminə çarə tapılmadı. Dünən növbəti dəfə Rəşad Məmmədovla əlaqə saxladıq:
“Bu hadisə baş verəndən sonra dərhal təmir işlərinə başlanılıb. Hər şey qaydasında gedir. Sadəcə, konkret vaxt deyə bilmirik. Çünki bu bizdən asılı olan səbəblər deyil. Amma çox qısa bir zamanda həllini tapacağına ümid edirik. Doğrudu, bu oyuna çatdıra bilmədik. Bizdən asılı olmadığı üçün vaxt deyə bilmirəm. Lakin mənim fikrimcə, çox yaxın müddətdə bu məsələ tam həllini tapacaq”.
MİRKAMAL KAZIMZADƏ
Digər xəbərlər
