Mark Zukerberqdən ara-sıra razılıq etməyi özümə borc bilirəm. Mənim yazılarımı müntəzəm oxuyan dəyərli oxucularım da təsdiqləyə bilər. Onlar şahiddi ki, vaxtaşırı bu gözəl insanı xatırlayıb, ona təşəkkür edirəm. Çünki 1984-cü ildə dünyaya göz açan bu amerikalı oğlan bizə “feysbuk” adlı möcüzə bəxş edib. Onun sayəsində fikirlərimizi dostlarımızla açıq şəkildə paylaşmaq üçün platforma əldə etmişik. “Feysbuk”un bizə verdiyi üstünlüklər təkcə bununla məhdudlaşmır. Bu sosial şəbəkə həm də əla bir tarix kitabıdı. Həmin kitabın sayəsində keçmişə səyahət edirsən, hansısa ilin hansı günündə nə düşündüyünü, nə haqda yazdığını görə bilirsən.

Bu nostalgiya hissləri bəzən səni kövrəldir, bəzən də utandırır, yaxud da qürurlandırır. Hətta öz sadəlövhlüyünə heyran qalıb, avamlığına gülə də bilirsən. Öz-özünə təəccüblənirsən ki, ilahi, mən 3-4 il əvvəl nə üçün bu qədər sadəlövh olmuşam, hansısa məsələnin həllinə belə bəsit münasibət sərgiləmişəm. Nahaq deməyiblər ki, söz vaxtını çəkər. Elə iki gün əvvəl “feysbuk” yenə də məni keçmişə qaytardı. Gördüm ki, altı il əvvəl dahi Anatoli Banişevskinin anım günündə həmkarlarımdan biri onun adının Azərbaycandakı stadionlardan birinə verilməsi ilə bağlı məsələ qaldırıbmış. Bəli, Masallıdakı futbol meydanına Banişevskinin adının verilməsindən hamımız xəbərdarıq. Amma acı bir həqiqət var ki, bu gün Masallının təmsilçisi Azərbaycanın futbol xəritəsində özünə yer tutmayıb. Belədə Anatoli Banişevskinin adına olan stadionda da hansısa futbol qarşılaşması keçirilmir ki, fenomenal şəxsiyyətin də adı tez-tez xatırlansın, hörmətlə anılsın. Mən hələ Avropa səviyyəli oyunlardan, avrokuboklarda ölkəmizi təmsil edən klublarımızın rəqiblərini qəbul etdiyi stadionlardan danışmıram.

Onu deyirdim axı... 6 il əvvəl mən və həmkarlarım bu mövzuda qızğın müzakirələr aparıb, AFFA-ya təklif ünvanlayırmışıq ki, bəs paytaxt Bakıda olan stadionlardan birinə Anatoli Banişevskinin adını vermək lazımdı. Hissə qapılmışıq, bir xeyli odlu və alovlu təklif vermişik, hərə öz namizəd stadionunu təklif edib. Markın sayəsində həmin müzakirəni görəndən sonra xatırladım ki, bizim apardığımız müzakirələrin cavabını həmin vaxt AFFA-nın prezidenti Rövnəq Abdullayev “layiqincə” vermişdi. Demişdi ki, onlar stadionların ad hüququ üçün sponsor axtarırlar, kimsə irəli durub, AFFA-ya pul versin. Ondan sonra da həmin o pul verənin istəyi ilə stadionu adlandıracaqlar. AFFA-nın o vaxtkı və indiki prezidenti yarıciddi, yarı da zarafat əlavə etmişdi ki, kimin pulu varsa, irəli durub, stadiona lap öz atasının, yoxsa babasının adını verə bilər. Yəni ki, Molla Nəsrəddinin məşhur lətifəsində olduğu kimi - pulu verən tütəyi çalar.

Ötən 6 ildə həyatımızda bir çox şey dəyişsə də, AFFA-da hakimiyyət, həm də idarəçilik və futbola baxış dəyişməyib. İndi bəziləri iddia edir ki, ay həzərat, baş katib Elxan Məmmədov dönüb olub “FİFA Elxan”. Bununla da Azərbaycan futbolunun bütün problemlərinin həllini tapacağına inam yaratmağa çalışırlar. Deyirlər ki, AFFA-da hazırda “milli qüvvələr” söz sahibidi. Hətta o dərəcədə ki, Elxan Məmmədov “Zirə”nin stadionuna gələndə AFFA prezidenti Rövnəq Abdullayev, PFL-in prezidenti Elxan Səmədov və AFFA-nın baş katibi Sərxan Hacıyev onu öz aralarına buraxmayıblar. “FİFA Elxan” da məcbur qalıb “FİFA Fatma”nın bir yanında özünə yer eləyib, məsum-məsum Rövnəq Abdullayevin və onun başına yığışanların söhbətinə qulaq yoldaşı olmağa çalışıb. Di gəl ki, Zirə qəsəbəsindəki stadionun dolu tribunalarının hay-küyündən qulaq tutulub. Nəticədə də “FİFA Elxan” Rövnəq Abdullayevlə Sərxan Hacıyevin Elxan Səmədovla nə danışdığını eşidə bilməyib. Əsəbindən dodaqlarını çeynəyə-çeynəyə Bakıdakı lüks mənzillərindən birinə qayıtmalı olub.

Bütün bunların nə dərəcədə həqiqət olduğunu deyə bilmərəm. Necə ki, AFFA-dakı islahat həvəsinin, “milli qüvvələr”in söz sahibi olmasının və həmin qüvvələrin Azərbaycan futbolunun xeyrinə nəsə iş görməsinin həqiqət olduğuna inanmıram. Dəqiq bildiyim bir odu ki, Anatoli Banişevskinin adına bir düz-əməlli stadion verilməyib. Sağlıq olsun, bir altı il də keçər, bu söhbəti yenidən xəcalət çəkə-çəkə xatırlayarıq. Özünüzdən muğayət olun!

AMAL