"Komandaya gənc və təcrübəli futzalçılar cəlb etmişik" - Vitali Borisov
"Bu matçda yaxşı nəticə qazanmağa çalışacağıq".
"Football-plus.az" xəbər verir ki, bunu futzal üzrə millimizin baş məşqçisi Vitali Borisov evdə Rumıniya yığmasına qarşı keçirəcəkləri DÇ-2024-ün elit mərhələsinin oyunundan əvvəl jurnalistlərə açıqlamasında deyib.
Mütəxəssis komandanın təlim-məşq toplanışının plan üzrə davam etdiyini bildirib:
"Bir-iki oyunçu dünən komandaya qoşulub. Hazırlıq gedir. Bu gün iki məşq edəcəyik. Rəqibin oyunlarına baxırıq, bizdə və onların heyətində bir az dəyişiklik var. Növbəti iki qarşılaşmanı ölkə çempionatında iştirak edən oyunçularla keçirmək qərarına gəldik. Az legioner dəvət etmişik".
Borisov növbəti mərhələ üçün şanslarının davam etdiyini xatırladıb:
"9 xal yığsaq da, hər şey öz əlimizdə deyil. Beş qrupda ən yaxşı ikinci yeri tutmuş 4 komanda növbəti mərhələyə vəsiqə qazanacaq. Rumıniyaya səfərdə 1:3 hesabı ilə uduzmuşduq. Amma belə olmamalıydı. Qol şansları yarada bilməmişdik. Bu dəfə evdə çıxış edəcəyik. Komandaya gənc və təcrübəli futzalçılar cəlb etmişik. Özlərini göstərməlidilər. Rumıniyanın 4 xalı silinib, 6 xal isə Niderlanda verilib. Bəlkə də bir az ruhdan düşəcəklər. İkinci pillədən üçüncü sıraya düşüblər".
Qeyd edək ki, dekabrın 15-də keçiriləcək Azərbaycan - Rumıniya matçı saat 20.00-da start götürəcək. Qazaxıstan 4 oyundan sonra 12 xalla A qrupunda liderdir, Niderland 6 xalla ikincidi. Rumıniya və millimiz isə 3 xalla 3-4-cü pillələri bölüşdürür.
Digər xəbərlər
