“Mançester Siti”nin akademiyasında çalışan Mustafa Alpər Avcı “Radyospor”a açıqlamalar verib.

"Football-plus.az" xəbər verir ki, 42 yaşlı türkiyəli mütəxəssis məşqçi karyerasına çox erkən - 22 yaşda başlayıb. “Qalatasaray”, “Fənərbaxça”, “İstanbul BŞ”, “Konyaspor”, “Altay”da işləmiş Avcı 2017-də Pro lisenziyası alıb. Daha sonra bir neçə il də Türkiyədə çalışan məşqçi xaricə, daha dəqiq desək, İngiltərəyə yollanıb. 2020-dən etibarən “Çorli” və “Port Veyl”də işləyən Avcı artıq bir ildən çoxdu “Mançester Siti”nin akademiyasında çalışır. Türkiyədə uşaq futbolunun problemlərindən danışan Avcı bunları deyib: “İngiltərə və Türkiyədəki “altyapı” sistemi arasındakı fərqdən danışmağa başlasam, verilişin vaxtı mənə kifayət etməz. Çünki fərq həqiqətən də böyükdü. Həm akademiyalardakı şərait, həm də ordakı işin təşkili baxımından yerdən göyə qədər fərq var. Ümumiyyətlə, ölkəmizdə bu baxımdan çox ciddi problemlər yaşanır. Məsələn, “Mançester Siti”də akademiya fərdlər üzərindən yox, sistem üzərindən davam etdirilir. Orda təşkilatçılıq və sistem fərdlərdən üstün tutulur. Kim gəlir-gəlsin, eyni sistemi davam etdirmək məcburiyyətində qalır. İstərdim ki, bizim də akademiyalarda bununla bağlı ciddi addımlar atılsın. “Siti Futbol Qrup” dünyanın bir çox ölkəsində futbola ciddi vəsait yatıran bir şirkətdi. Bu şirkətin satın aldığı klublar arasında, sözsüz, ən güclüsü “Siti”di. Bu layihənin mərkəzinə məhz “Siti”ni qoyublar. Bildiyimə görə, onların Türkiyə, Finlandiya və Koreyada da klub almaq düşüncəsi var. Ümid edirəm ki, bu layihə həyata keçirilər və ölkəmizdə də örnək bir futbol modeli yaradılar”.

Qeyd edək ki, əsasən ərəblər (eləcə də amerikalılar və çinlilər) tərəfindən idarə olunan “Siti Futbol Qrup” “Mançester Siti”dən başqa “Nyu York Siti”, “Mumbay Siti”, “Jirona”, “Palermo”, “Trua”, “Bayya”, “Yokohama Marinos”, “Sıçuan Tsınyu”, “Montevideo” və “Melburn Siti”nin də sahibidi.