"Norveçdən uğurlu nəticə ilə dönmək istəyirik"
"Norveçdə yaxşı oyun sərgiləyib, uğurlu nəticə ilə dönmək istəyirik".
"Football-plus.az" xəbər verir ki, bunu "Qarabağ"ın baş məşqçisi Qurban Qurbanov "Molde" klubuna qarşı keçiriləcək UEFA Avropa Liqasının qrup mərhələsinin 5-ci turunun oyunu ilə bağlı Heydər Əliyev Beynəlxalq Hava Limanında jurnalistlərə açıqlamasında deyib.
51 yaşlı mütəxəssis qarşılaşmaya ciddi hazırlaşdıqlarını bildirib:
"Matça hazırlığımız pis keçmədi. Hər şey qaydasındadı. Oyun günü son məşqimiz olacaq. Qarşılaşmaya hazırlığı da o zaman bitirəcəyik. İnanıram ki, uğurlu oyun alınar. Yəqin ki, rəqib də eyni fikirdədi. Onların da böyük şansı var. Məncə, meydanda ciddi mübarizə gedəcək. "Molde"nin evdə oynayacağını da nəzərə alırıq. Üstəlik, meydanları süni örtüklüdür. Yenə də öz oyunumuzdan əl çəkməməyə çalışacağıq. Bunu bacarıb-bacarmayacağımızı oyunda biləcəyik".
Qeyd edək ki, sabah keçiriləcək "Molde" - "Qarabağ" matçı Bakı vaxtı ilə saat 00.00-da başlayacaq. Hazırda hər iki komandanın hesabında 6 xal var.
Digər xəbərlər
