“Qarabağ”ın Avropa Liqasının qrupundakı rəqiblərindən "Molde" Norveç çempionatında 29-cu turun oyununa çıxıb.

"Football-plus.az" xəbər verir ki, sözügedən komanda səfərdə “Sarpsborq”la qarşılaşıb. 3:1 hesablı qələbə sayəsində xalını 50-yə çatdıran "Molde" hazırda turnir cədvəlində beşincidi. Erlinq Moe bu futbolçulara güvənib: 12. Oliver Petersen, 28. Kristoffer Hauqen, 3. Kasper Öyvann, 19. Eyrik Hauqan, 6. Martin Ellinqsen (2. Martin Byörnbak, 46), 31. Matias Lövik (25. Anders Haqelskyaer, 38). 20. Kristian Eriksen, 16. Emil Breyvik, 33. Niklas Ödeqard, 9. Veton Berişa (7. Maqnus Volff Eykrem, 64), 10. Erik Kitolano (38. Andreas Eykrem Mayklebust, 85).

Norveçli mütəxəssis komandanı meydana 3-5-2 taktiki sxemi ilə çıxarıb. Lakin müdafiə olunan zaman bu düzülüş 5-3-2-yə çevrilir. “Molde” ilk təhlükəli hücumu qola çevirib. Lövik müdafiədə yaranan qarışıqlıqdan istifadə edərək gözəl zərbə ilə topu qapıya göndərib.

İlk 30 dəqiqə qonaqların üstünlüyü şəraitində keçib. Bu zaman aralığında topa nəzarət edən də Moenin komandası idi. “Molde” 18-ci dəqiqədə Berişa ilə daha bir qol vurmağa yaxın olsa da, meydan sahiblərinin qolkiperi etibarlı oynayıb. “Sarpsborq” da hücumlar qurmağa çalışıb. Belə məqamlarda qonaqların müdafiəsindəki boşluqlar açıq-aşkar görünüb. “Molde” cinahlardan uzun ötürmələr zamanı topu qarşılamaqda problem yaşayıb. 2-ci qolu da qonaqlar vurub. 44-cü dəqiqədə Hauqen möhtəşəm cərimə zərbəsi ilə rəqibi məyus edib.

“Molde” 2-ci hissəyə də fırtına kimi başlayıb və 50-ci dəqiqədə 3-cü qolu rəqib qapısından keçirib. Sol cinahdan ötürülən topu qəbul edən Ödeqard hücumu dəqiq zərbə ilə tamamlayıb. Qonaqlar qələbəni təmin edəndən sonra gücünü “Qarabağ”la oyun üçün qoruyub. “Molde” geri çəkilərək əks-hücumlara bel bağlayıb. Düzdü, “Sarpsborq” təsəlli qolunu vura bilib. Beləliklə, “Molde” “Qarabağ”la vacib oyun ərəfəsində çempionatda qələbə sevinci yaşayıb.

Yeri gəlmişkən, "Qarabağ"ın bu oyundan əvvəl son məşqi Bakıda baş tutacaq. Bu gün, saat 18.30-da "Azərsun Arena"da gerçəkləşəcək hazırlıq prosesinin ilk 15 dəqiqəsi media üçün açıq olacaq. Baş məşqçi Qurban Qurbanovun iştirakı ilə təşkil olunacaq mətbuat konfransı Norveçdə reallaşacaq. Sabah üçün planlaşdırılan tədbir yerli vaxtla saat 19.00-da (Bakı vaxtı ilə saat 22.00-da) başlayacaq. Xatırladaq ki, noyabrın 30-da keçiriləcək oyun Bakı vaxtı ilə saat 00.00-da başlayacaq. Hazırda hər iki komandanın hesabında 6 xal var. 2-ci yer uğrunda mübarizədə həlledici qarşılaşmadan öncə “Qarabağ” 2-ci, “Molde” isə 3-cü pillədə qərarlaşıb.

Ağdam təmsilçisi bu oyunda komandanı dəstəkləmək istəyən azarkeşlərə müraciət edib. Klub biletlərin oyun günü - noyabrın 30-u yerli vaxtla saat 19.00-dan etibarən “Molde” stadionunun K sektorunun qarşısında satılacağını bildirib. Qiymət 400 Norveç kronu (təxminən 17,05 avro) təşkil edir. Bilet almaq istəyən şəxslərdən özləri ilə şəxsiyyəti təsdiq edən sənəd götürmək tələb olunur.

İLKİN SULTANLI