Həmişə "Sabah"ın ev oyunlarına ən azı 2-3 saat tez gedərdim.

Ya metronun “Memar Əcəmi” stansiyasının çıxışından  avtobusla, ya da “Şamaxinka” adlanan yerdən 1 manatlıq taksilərlə Masazırdakı stadiona yollanardım. Bu dəfə  "Bank Respublika Arena"ya fərli marşrutla gedəcəkdim. Yeniliyin səbəbi iş yoldaşım İsmayıl Xeyrullayevin təşəbbüsü idi. "Davam” Gənclər Hərəkatının "Sabah" sevərləriylə birgə matça gedəcəkdik. "Sabah" - "Qarabağ" qarşıdurması turun mərkəzi oyunu olacağından meydan sahibləri azarkeşlər üçün avtobus ayırmışdı. 106 (36-sı qız) gənc futbolsevərin yer aldığı iki avtobus “Gənclik” metrosunun yaxınlığından Masazıra yollandı. Azarkeşlərin təşkilatlanmasına  "Davam”ın üzvü Emin Fətullayev məsul idi. 19 yaşlı balacaboy gəncin təşkilatçılıq və liderlik bacarıqları adamı heyran edirdi. Azarkeşlər avtobusa yerləşərkən zərif cins nümayəndələri öndə, oğlanlar isə arxa yerlərdə əyləşdirildi. Emin Fətullayev həmçinin "Sabah"ın əsas davulçusu olmaqla yanaşı, klubun yeni fanklubu yaratmağa iddialıdı. O, yolboyu futbolsevərlərə komandaya dəstək, stadionda davranış qaydaları, əxlaqsız şüarlardan uzaq olmaq və başqa bu kimi mövzularla bağlı təlimatlar çatdırdı. Belə gəncləri məktəblərdəki müəllimlərə, dövlət orqanlarındakı məmurlara və bəzi deputatlarımıza nümunə göstərmək lazımdı. Qısası, sərnişinlər xoş əhval-ruhiyyədə, rus repçi Jan Xhalibin və Eyyub Yaqubovun mahnılarının sədaları altında bəlli marşrut üzrə stadiona çatdı. Stadionun girişində fanatlara "Sabah"ın şərfləri paylandı.

ABDULLA İSMAYILOĞLU