Son iki gündə MBA-da keçirilən oyunlarla bağlı çox maraqlı məqamlar var.

“Football-plus.az” xəbər verir ki, “Leykers”in forvardı Lebron Ceyms karyerası boyunca topladığı xal sayını 39 minə çatdırdı. 39 yaşını dekabrda tamamlayacaq ulduz basketbolçunun hesabında “Yuta” ilə oyun ərəfəsində 38995 xal var idi. Lebron elə ilk çeyrəkdə 7 xal toplamaqla 39 min xal həddini aşdı. Ceyms MBA tarixinə 39 min xal toplamağı bacaran ilk basketbolçu kimi düşdü. Ən çox xal toplayanların siyahısında 2-ci yerdə Kərim Əbdül-Cabbar (38387), 3-cü yerdə Karl Meloun (36928), 4-cü yürdə Kobe Brayant (33643), 5-ci yerdə isə Maykl Cordan (32 292) qərarlaşıb.

Karyerasında 21-ci mövsümü keçirən Lebron cari mövsümdə meydana çıxdığı hər oyunda orta hesabla 26,4 xal toplayıb, 8,2 ribaund edib və 6,4 məhsuldar ötürmə verib. Ondan bu yaşda da peşəkar idmanda motivasiyanı necə qoruduğunu soruşublar: “Mümkün olanların sərhəddini genişləndirməyə çalışıram. Baxaq görək nə qədər uzağa gedə biləcəm. Bilmirəm. Mən zamanın axarına qarşı gedən adamam”.

Fəaliyyətdə olan basketbolçular arasında başqa xal hesabını artıranlar da var. “Finiks”in forvardı Kevin Dürant dünən MBA tarixinin snayperləri siyahısında 11-ci pilləyə yüksəldi. O, “Hyuston” və “Vaşinqton”un mərkəz oyunçusu Elvin Hyuzu arxada qoydu. Dürant komandasının “Portlend”ə 120:107 hesabıyla qalib gəldiyi oyunda hamıdan çox – 31 xal topladı. 35 yaşlı amerikalının hesabında artıq 27331 xal var. Heyz isə karyerası boyunca 27313 xal toplayıb. Dürantdan irəlidə - 10-cu pillədə 27409 xalla Mozes Meloun qərarlaşıb.

Dünən keçirilən “Atlanta” – “İndiana” oyunu ilə bağlı maraqlı statistikaya da toxunaq. “İndiana” səfərdə 157:152 hesabıyla qalib gəldi. Bu oyun MBA tarixinə hər iki komandanın 150 və daha artıq xal topladığı 7-ci qarşılaşma kimi düşdü.

21 noyabr
Vaşinqton – Miluoki 129:142 (27:31, 38:39, 37:34, 27:38)
Detroyt – Denver 103:107 (23:27, 32:29, 24:25, 24:26)
Şarlott – Boston 121:118 (25:31, 29:34, 27:22, 27:21, 13:10)
Minnesota Nyu-York 117:100 (31:28, 27:28, 35:19, 24:25)
Nyu-Orlean Sakramento 129:93 (29:31, 37:22, 34:16, 29:24)
San-Antonio Klippers 99:124 (27:33, 28:33, 22:25, 22:33)
Çikaqo Mayami 100:118 (27:33, 26:32, 28:28, 19:25)
Qolden Steyt – Hyuston 121:116 (29:27, 34:26, 29:28, 29:35)
22 noyabr
Orlando Toronto 126:107 (30:23, 37:33, 33:26, 26:25)
Atlanta – İndiana 152:157 (40:34, 46:39, 28:46, 38:38)
Filadelfiya 76 – Klivlend 119:122 OT (24:27, 29:38, 26:23, 31:22, 9:12)
Finiks – Portlend 120:107 (34:21, 22:30, 38:31, 26:25)
Leykers – Yuta 131:99 (32:17, 30:24, 40:34, 29:24)