AÇ-2024-ün seçmə mərhələsinə yekun vuruldu. Artıq turnirdə iştirak edəcək 21 yığmanın adı, eləcə də bütün “səbətlər” bəllidi.

Digər 3 komanda isə pley-offlardan sonra bəlli olacaq. Hələlik püşkatma komandaların yer aldığı 4 “səbət” ilə tanış olaq.

1-ci “səbət”: Almaniya, Portuqaliya, Fransa, İspaniya, Belçika, İngiltərə.
2-ci “səbət”: Macarıstan, Türkiyə, Danimarka, Albaniya, Rumıniya, Avstriya.
3-cü “səbət”: Niderland, Şotlandiya, Xorvatiya, Sloveniya, Slovakiya, Çexiya.
4-cü “səbət”: İtaliya, İsveçrə, Serbiya və pley-offdan gələcək 3 komanda.

Diqqəti çəkən ilk məqam İtaliyanın sonuncu “səbət”də qərarlaşmasıdı. Amma italyanların DÇ-2022-nin seçmə mərhələsindəki uğursuzluğunun bura heç bir aidiyyatı yoxdu. “Səbətlər” sırf cari seçmə mərhələnin nəticələrinə əsasən müəyyənləşdirilir. Yalnız Almaniya ev sahibi kimi 1-ci “səbət”də əvvəlcədən özünə yer etmişdi. Almanların yanına seçmə mərhələdə ən çox xal toplayanlar, yəni Portuqaliya, Fransa, İspaniya, Belçika və İngiltərə qoşuldu. Düzdü, bəzi qruplarda 6, bəzilərində isə 5 komanda çıxış edirdi. UEFA bunu da ən sadə yolla həll etdi. 6 komandalı qrupda liderlərin sonuncu pilləni tutan kollektivlərlə iki görüşdə topladığı xallar silindi. Məsələn, Portuqaliya 30 xal toplasa da, Lixtenşteynlə oyunlarda qazanılan 6 xal çıxıldı.

2-ci “səbət”ə ən az xal toplamış qrup liderləri və ən çox xal toplamış qrup ikinciləri daxil edildi. Bu üzdən Avstriya da Macarıstan, Türkiyə, Danimarka, Albaniya və Rumıniya ilə birlikdə bu siyahıdadı.

3-cü “səbət”də Avstriyadan sonra ən çox xal toplayan qrup ikinciləri, yəni Şotlandiya, Xorvatiya, Sloveniya, Slovakiya, Çexiya və Niderland qərarlaşıb.

4-cü səbətdə yer alan 3 komanda isə qrup ikinciləri arasında ən az xal toplayan kollektivlərdi! Məhz buna görə də AÇ-nin son qalibi statusunda olan İtaliya İsveçrə və Serbiya ilə birlikdə son “səbət”dədi! Digər 3 iştirakçı isə Millətlər Liqasından yoluna davam edən 12 komanda arasından müəyyənləşəcək (bu haqda başqa yazıda oxu - red.). Onların adlarına gələn ilin martında aydınlıq gələcək.

Sonda qeyd edək ki, AÇ-2024-ün final mərhələsinin püşkatması dekabrın 2-də keçiriləcək.