Əsas millimizin AÇ-2024-ün seçmə mərhələsində Belçikaya məğlub olduğu (0:5) matçla bağlı bütün detallara toxunmuşduq.

“Turan Manafov komanda yoldaşlarının yanında olmağı lazım bilmədi” sərlövhəli yazıda isə futbolçu haqda diqqətçəkən məqamdan söhbət açmışdıq.

Xatırladaq ki, millimizin üzvü 77-ci dəqiqədə, yəni oyunun bitməsini gözləmədən paltardəyişmə otağına yollanmışdı. Daha maraqlısı isə odu ki, həmin anda Emin Mahmudov Elvin Camalovla əvəzlənmişdi, yəni De Byazinin dəyişiklik limiti tükənmişdi. Əlbəttə, belə olan halda, onun ehtiyat oyunçula skamyasını tərk etməsi qəribə fikirlərə yol açır. Bəlkə futbolçu debüt edə bilməyəcəyinin fərqinə vardığı üçün özünü kənara çəkib? Məsələnin məğzini öyrənmək üçün Turan Manafovla əlaqə saxladıq. Oyunçu tualetə getdiyini və bunun üçün texniki zonada əyləşən məşqçilərdən icazə aldığını dedi. Hətta bildirdi ki, bir yox, iki dəfə paltardəyişmə otağına gedib-qayıdıb.

Biz onu yalan danışmaqla suçlamırıq. Hər halda, həqiqəti yalnız özü bilir. Ya baş verənlərin məhz dəyişiklik limitinin tükəndiyi anda yaşanması təsadüfdü, ya da oyunçu kimisə aldadır. Şəxsən mən inanmadım...

KƏNAN BAHADIR