“Məhz büdcə ayrılandan sonra stadion təmirə bağlandı” – qəribə köçün səbəbi
1-ci liqa təmsilçisi "Difai Ağsu" 10-cu turdan etibarən ev oyunlarını Şamaxı şəhər stadionunda keçirəcək. Buna səbəb Ağsu stadionun təmirə bağlanmasıdı.
Ortaya iki sual çıxır: Ağsu stadionunu çempionatın startına qədər təmir etmək mümkün deyildimi? Artıq Şamaxıda stadionunda oynayan komandaların sayı üçə çatdı ("Şamaxı", "Şahdağ Qusar", "Difai Ağsu"). Qazonun yüklənməsi onun vəziyyətində problem yaratmayacaqmı?
“Football-plus.az” məsələ ilə bağlı "Difai Ağsu"nun prezidenti Asəf Məlikova müraciət etdi:
"Ev oyunlarımızı Ağsu şəhər stadionunda keçirsək də, futbol məkanı AFFA-nın balansındadı. Ona görə də təmirlə bağlı suallarınızı o quruma versəz, yaxşı olar. Bundan sonra ev oyunlarını Şamaxıda keçirməyə gəlincə, bizə ən yaxın və normal şəraiti olan stadion ordadı. Buna görə belə qərara gəldik".
AFFA-ın sözçüsü Elnur Məmmədliyə də müraciət etdik:
"Ağsu stadionunun ciddi təmirə ehtiyac var, demək olar ki, yenidən qurulmalıdı. Təmir və yenidənqurma işlərinin indi həyata keçirilməsi büdcə ilə bağlı idi. Məhz büdcə son günlərdə ayrılandan sonra stadion təmirə bağlandı. Şamaxı stadionunda bir neçə komandanın oynamasına gəlincə, istər Qusar, istərsə Ağsu təmsilçisinin oyunlarının keçirilməsini ətraf bölgələrdə təmin edəcək normal şəraitli stadion olmadığından Şamaxı seçilib. Bu üç komandanın oyunları fərqli günlərdə olacağından, qazon yüklənməyə məruz qalmayacaq".
ABDULLA İSMAYILOĞLU
Digər xəbərlər
