“Dünya və Avropa məşqçiləri bizim milli komandaya bankomat kimi yanaşır”
Yazar, şair Şəhriyar Del Gerani qəribə paylaşımla diqqəti çəkib.
Qələm sahibi Azərbaycan yığmasının doğma meydanda İsveçi məğlub etməsini Qarabağ zəfəriylə əlaqələndirib. Kapitan Emin Mahmudovun qolunu da xüsusi şişirdib. Paylaşımı olduğu kimi diqqətinizə çatdırırıq:
"Heç kimin xətrinə dəyməsin, İsveç millisiylə dünənki oyunda Emin Mahmudovun vurduğu özünün ikinci, komandasının üçüncü qolunda Qarabağ Zəfərimizin birbaşa rolu var. Yalnız qalib xalqın yığmasının hücumçusu o boyda məsafədən - təxminən meydançanın mərkəzindən qol vurmaq haqda DÜŞÜNƏ bilər. Bir daha təkrar edirəm, söhbət qoldan getmir, vurulan top qol olmaya da bilərdi, söhbət onca məsafədən qol vurmaq haqda düşünmək cəsarətindən gedir. Bəli, cəsarət kişinin istedadıdı. Bu, haqq sözdür. Bu cəsarəti də bizə QARABAĞ ZƏFƏRİmiz qaytardı. Bütün qazilərimizə Allahdan səbr və şəfalar, şəhidlərimizin ruhuna Eşqlər!"
Şairin bu paylaşımını futbol ictimaiyyəti, azarkeşlər birmənalı qarşılamayıb. Hətta iki gün əvvəlki biabırçı məğlubiyyətdən sonra onun futboldan zərrəcə anlayışı olmayan, populist biri olduğunu vurğulayanlar da tapıldı. Məşhur paylaşımla bağlı Del Geranidən reaksiya aldıq:
"Düşünürəm ki, Azərbaycanın başqa bütün sahələrdəki uğurlarında Qarabağ Zəfərimizin rolu var və olacaq. Bir daha qeyd edirəm, söhbət düşüncənin mahiyyətindəki uğurdan, cəsarətdən gedir" .
Şair Belçika ilə oyundan sonra De Byazinin mətbuat konfransında səsləndirdiyi ifadələrə də toxundu:
"De Byazinin idman jurnalistlərini təhqir etməsinə gəlincə, bu, əlbəttə, hər şeyi öz adıyla çağırsaq, tərbiyəsizlikdi. İtaliyalı üzr istəyib istefa ərizəsini yazmalıdı əxlaqi cəhətdən. Fikrimcə, yığmanın baş məşqçisi azərbaycanlı olmalıdı. İndi deyəcəklər “dünya təcrübəsi elə, Avropa təcrübəsi belə”. Bunlar hamısı aldanışdı. Puç aldanışlar. Dünya və Avropa məşqçiləri bizim milli komandaya bankomat kimi yanaşır. Bizə Azərbaycan, “Qarabağ FK” təcrübəsi lazımdı. Məsələn, niyə milli komandamızın baş məşqçisi Arif Əsədov olmasın?".
ABDULLA İSMAYILOĞLU
Digər xəbərlər
