Qələbə necə də gözəldi! Dərhal əhval-ruhiyyəni qaldırır, adama nikbinlik və inam bəxş edir.

Dünən Bakı vaxtı ilə saat 16.05-də havaya qalxan, Brüsselə doğru uçan təyyarədə yer alan Azərbaycan yığmasının üzvlərinin bir gün əvvəl İsveçi darmadağın etdiyi hiss olunurdu. Canni de Byazi ərklə futbolçularla zarafat edirdi, qələbənin memarları çox inamlı görünürdü. Təyyarə bələdçisi də uçuş başlamamış yığmanı inamlı qələbə münasibəti ilə təbrik etdi.

6 saatdan artıq sürən uçuşdan sonra Brüsselə çatdıq. Rəsmi nümayəndə heyəti və futbolçular dərhal onlar üçün ayrılan otelin yolunu tutdu. Jurnalistlər isə bir qədər də ləngidi. Mən bu sətirləri yazanda Bakıda artıq saat 23.32-di. Burda, yəni Brüsseldə hava soyuq, həm də yağışlıdı.

Bildiyimə görə, Belçika Kral Futbol Assosiasiyasının rəsmiləri AFFA-dan olan həmkarlarına oyunöncəsi məşqin “Kral Boduen” stadionunda yox, başqa yerdə keçirilməsini təklif edib. Belçikalılar davamlı yağışlar üzündən qazonun yararsız hala düşəcəyindən narahatdı. Təklif qəbul olunub. Elə meydan sahibləri də oyunöncəsi məşqə başqa stadionda çıxacaq. Yığmamız isə qərarlaşdığı “Courtyard By Marriott” otelinin yanında özünə stadion tapacaq.

Bazar günü keçiriləcək oyunda gözlənilən azarkeş dəstəyinə gəlincə, hələlik “Milli Dəstə”nin 100 nəfərlik qrupla tribunada olacağı dəqiqdi. Başqa soydaşlarımızın da stadiona gələcəyini nəzərə alsaq, yığma ümumilikdə 200 azərbaycanlının dəstəyinə arxalana bilər. Dəstək oldu-olmadı, komanda ən yaxşı keyfiyyətlərini göstərməyə, İsveç üzərində qələbədən sonra azarkeşlərin ürəyində yanmağa başlayan ümid çırağını bir qədər də alovlandırmağa borcludu.

HUŞƏNG