"Sabah" FİBA Avropa kubokunun qrup mərhələsinin 5-cü turunda "Baxçaşəhər"in qonağı olacaq.

Oyunla bağlı "tələbələr"in üzvü Şirzad Şirzadov "Football-plus.az" saytının bəzi suallarını cavabladı.

- Sabah Türkiyədə "Baxçaşəhər"lə vacib oyuna çıxırsız. Fikirlərin maraqlıdı.
- "Baxçaşəhir" çox ciddi rəqibdi. Bu matçda yaxşı hazırlaşmışıq. Təbii ki, onlar evdə oynadıqlarına görə üstünlükləri var. Lakin biz də meydanda bütün gücümüzü göstərəcəyik ki, qalib gələk.

- "Baxçaşəhir" iki mövsüm əvvəl bu turnirin qalibi olub. İddialı rəqiblərdən biridi. Türkiyə təmsilçisi ilə artıq Bakıda da oynamışıq. Səncə, rəqibin nə kimi üstünlükləri var?
- Qrupda birinci yerdə gedirlər, meydanda çox təcrübəli, sürətli çıxış edirlər. Həmçinin də onların oyunçuları ucaboy olduğundan səbətin altında daha üstündülər. Məsələn, Toni Teylor, Cerri Botille kimi təhlükəli basketbolçuları var.

- Bizim "Baxçaşəhir" qarşısında üstünlüyümüz nə ola bilər?
- Müdafiədə yaxşı oynayacağımız təqdirdə onların hücumda olan əsas oyunçularının qarşısını ala bilərik.

- Çempionatda da işləriniz yaxşı gedir - iki oyun və iki qələbə.
- Ölkə çempionatının oyunları bizim üçün rahat keçdi. Ümid edirəm ki, gələcəkdəki matçlarımız da belə olar. Ancaq liqamızda "NTD-İndiqo", “Neftçi", "Xəzri" kimi güclü, mübariz klublar var. İnşallah, bu komanadalara da qalib gələrək mövsümü birinci yerdə bitirərik.

Xatırladaq ki, oyun Bakı vaxtı ilə saat 20.00-da start götürəcək.

CAVİD ƏLİYEV