"Deməli, 2022/23 mövsümündə "Qəbələ"nin U-19 komandası mənim başçılığım altında və "Sabah"ın U-17-si Saşa Yunisoğlunun rəhbərliyi ilə ölkə çempionu olmağı bacardı. Məhz bu səbəbdən AFFA praktikamızı artırmaq məqsədilə bizi 6 günlüyə "Fənərbaxça"nın akademiyasında təcrübə keçməyə göndərdi. Bu müddət ərzində biz akademiyanin əlaqələndiricisi, rəhbər və məşqçi heyəti ilə görüşdük. İnfrastrukturla yaxindan tanış olduq, məşqləri və oyunları izlədik . Həmçinin də texnika, taktika, fiziki hazırlıq və psixoloji yanaşma ilə bağlı mütəxəssislərlə fikir mübadiləsi apardıq. Öz adımdan deyə bilərəm ki, belə səfərlər mənim üçün ilk deyildi. Çünki "Qəbələ" rəhbərliyinin təşkilatçılığı ilə Fransanın "Lion", "Nant", Ukraynanın "Şaxtyor", Gürcüstanın "Dinamo" (Tiflis) kimi klublarında bu cür seminarlarda və səfərlərdə olmuşam. Düzdü, "Fənərbaxça" səfəri də çox maraqlı oldu. Belə ki, yetərincə nüfuzlü klubdan nəsə götürməmək mümkün deyil. Akademiyada 50-60 arası futbolçu qalır. Bu uşaqlar yeməklə, yataqla, məşqlərlə, məktəbə getmək üçün servislə təmin olunur. Məşqçilər isə ofislə, yeməklə, istirahət otaqları olan baza ilə tam təmin olunub. Yuxarda qeyd etdiyim məsələlər bizim "Qəbələ", "Sabah" və başqa klublarda da aşağı-yuxarı eynidi. Ancaq əskiklər ondan ibarətdi ki, "Fənərbaxça"nın aşağı yaş komandaları süni meydanlarda məşq edir. Məncə, "Qəbələ"nin akademiyası infrastruktur baxımından daha üstündü. Koordinasiyalı heyət isə türklərin üstün olmasını saxlayan amildi. Belə ki, hər qrupa nəzarət edən heyət böyüklüyü ilə diqqət çəkirdi. Sadəcə, bir qrupa baş məşqçi, köməkçi məşqçilər, analitiklər, atletik performans məşqçisi, qapıçı məşqçisi, inzibatçı, psixoloq kimi heyət nəzarət edir. Bu isə uşaqların inkişafı üçün çox önəmlidi. O zaman nəzarət etmək daha asan olur. Bizdə isə heyət məhduddu. “Fənərbaxça” müasir texnologiyalara inteqrasiya edir. Bu səfərin təşkilatçılığına görə AFFA rəhbərliyinə təşəkkür edirəm".