“Qəbələ”nin U-19 komandası Zəfər Günü tarixi matça çıxdı.

“Qırmızı-qaralar” Gənclər Liqasında “Olimpiakos”la qarşılaşırdı. Pireylilər bu görüşü çox ciddiyə almışdılar. Rəqib oyundan üç gün əvvəl Azərbaycana gəlmişdi. Əvvəlcə Bakıda, oyundan bir gün əvvəl isə Qəbələdə məskunlaşaraq qarşılaşmaya hazırlaşdılar.

Vacib oyun olduğunu nəzərə alıb yollandım Cavanşirin diyarına. Səfərə tək yollanmaqdan xoşum gəlmir. Yolboyu söhbət, futbol müzakirəsi etməsinsə, daha nə ləzzəti?! Sonradan öyrəndim ki, Atanur Cəfərlinin İdman Könüllüləri və Azarkeşləri Birliyinin üzvləri də Qəbələyə gedir. Onlar da Zəfər Günü ilə bağlı bu şəhərdəki şəhidimiz Təbriz Qasımovun məzarını ziyarət edəndən sonra “qırmızı-qaralar”a dəstək olmaq üçün oyuna gedəcəkdilər. Sağ olsun Atanur Cəfərli, xahişimizi yerə salmadı. Bir sözlə, gənclərlə birlikdə Qəbələyə yollandıq.

Yolboyu Azərbaycanın gələcəyinin nə qədər əmin əllərdə olduğunu dərk etdim. Mənlə birgə Qəbələyə gedən gənclər olduqca savadlı və dərrakəli idi. Onların elmi müzakirələrini, söhbətlərini eşitdikcə sevinirdim. Çoxu tələbə idi. Xanımlardan biri 7 dildə danışa bilirdi. Digəri 18-19 yaşı olmasına baxmayaraq, artıq iki-üç ölkəyə səfər etmişdi. Adaşım İlkin Dövlət Bədən Tərbiyəsi və İdman Akademiyasında təhsil alırdı. Magistr təhsilini idman jurnalistikası ixtisası üzrə etmək istəyirdi. Hiss olunurdu ki, gənclərimiz universitet oxumaq xətrinə təhsil almırlar. Bu da orta yaşlı azərbaycanlını sevindirməyə bilməz.

Futbolla bağlı gələcəyimiz isə sual altındadı. Çünki “Qəbələ”nin U-19 komandası “Olimpiakos”la matça heç də yaxşı başlamadı. Artıq 2-ci dəqiqədə cərimə meydanında rəqibin hücumunun qarşısı aşkar kobudluqla alındı. Hakim qapımıza 11 metrlik cərimə zərbəsi təyin etdi. Topun başına keçən Mouzakitis dəqiq zərbə ilə hesabı açdı. İlk 15 dəqiqə rəqibin üstünlüyü şəraitində keçdi. 17-ci dəqiqədə hakim yenə qapımıza penalti təyin etdi. Lakin Mouzakitis bu dəfə dəqiq ola bilmədi. Həbib Huşənov etibarlı oyunu ilə diqqəti çəkdi. Bundan sonra komandamız hücuma atıldı. Lakin ilk hissənin sonuna kimi nə iləsə yadda qala bilmədi.

Fasilədən sonra “Qəbələ”nin gənclərinin yetərincə qol imkanı oldu. Lakin Famil Xəlilovun yetirmələri əllərinə düşən şansları sağa-sola xərcləməklə məşğul idi. “Vurmayana vurarlar” prinsipi növbəti dəfə doğruldu. 64-cü dəqiqədə Kostoulas, 87-ci dəqiqədə Darviras fərqlənərək “qırmızı-qaralar”ın növbəti mərhələ ümidini elə ilk oyundaca öldürdü. Beləliklə, matç 3:0 hesabıyla rəqibin xeyrinə başa çatdı. Famil Xəlilovun komandasının Pireydə böyük hesablı qələbə qazanması inandırıcı deyil. Lakin ən azı layiqincə müqavimət göstərmək olar.

İLKİN SULTANLI