Atanur Cəfərli: “Dərinliyə getmək istəmirəm, amma bayrağı içəri keçirmək çətin olmadı” - AÇIQLAMA
Türkiyə yığması sentyabrın 8-də AÇ-2024-ün seçmə mərhələsində Ermənistanla qarşılaşdı.
Qalibin bəlli olmadığı matçla (1:1) bağlı ölkəmizdə geniş diskussiyanın açılması təbiidi. Belə ki, Türkiyə Futbol Federasiyasının UEFA-nın tələbinə uyğun olaraq Azərbaycan bayraqlarının stadiona keçirilməsinə qadağa qoyduğundan azarkeşlər qəzəbli idi. Lakin oyunun gedişində maraqlı hadisə yaşandı. Sosial şəbəkələrdə azərbaycanlı azarkeş Atanur Cəfərlinin bayrağımızı tribunalarda dalğalandırdığı fotolar yayınlandı. Bəlli oldu ki, həmyerlimiz hansısa yolla qadağanı pozub və ciddi yoxlamaya rəğmən, bayrağı stadiona keçirib. Görəsən, o, bunu necə bacarıb? Bayrağı açarkən tribunada əyləşənlərin reaksiyası nə olub? Azarkeşin hərəkətinə müdaxilə edilibmi?
Bu suallara cavab tapmaq üçün Atanurla əlaqə saxladıq. Onun "Football-plus.az"a söylədikləri:
"Matç günü başqa işlə bağlı Türkiyədəydim. Bilindiyi kimi, "İdman Könüllüləri və Azarkeşləri" İctimai Birliyinin sədriyəm. Qardaş ölkədə əməkdaşlıq etdiyimiz "Gənclik və İdman Könüllüləri"ylə birlikdə tədbirlərə qatıldıq. Daha sonra əvvəllər təhsil aldığım Əskişəhərə yollandım. Tələbə olduğum vaxtlarda şəhərin stadionuna dəfələrlə getmişdim. Yəni ora ilə bağlı bütün detallara bələdəm. Dərinliyə getmək istəmirəm, amma bayrağı içəri keçirmək çətin olmadı. Mən tribunada bayrağımızı dalğalandıranda hər kəs sevinclə qarşıladı, mənlə şəkillər çəkdirdi. Polis əməkdaşı qadağayla bağlı xəbərdarlıq etsə də, çox üstümə gəlmədi. Sona qədər bayrağımızı nümayiş etdirdim və heç bir problem olmadan stadiondan ayrıldım".
Maraq üçün qeyd edək ki, UEFA qayda pozuntusuna görə Türkiyə Futbol Federasiyasına sanksiya tətbiq edə bilməz. Yalnız pul cəriməsindən söhbət gedir ki, o da təxminən 35 min avro təşkil edir.
KƏNAN BAHADIR
Digər xəbərlər
