Azərbaycanlı voleybolsevərlərin unuda bilmədiyi bir mütəxəssis var. Yox, söhbət Faiq Qarayevdən getmir, onun yeri ayrıdı. Həmin insan 2012/13 mövsümündə “Rabitə”yə rəhbərlik etmiş, komandanı böyük uğurlara daşımış Marsello Abbondanzadı.
53 yaşlı italiyalı mütəxəssislə əlaqə saxladıq, keçmiş günləri yada saldıq.
- Uzun müddətdi ölkəmizi tərk etmisiz. Hazırda harda işləyirsiz?
- Koreyada - “Pink Spiders” komandasında. Hər şey yaxşıdı.
- Azərbaycanı, “Rabitə”ni necə xatırlayırsız?
- Bakı möhtəşəm şəhərdi. Azərbaycanla bağlı çox yaxşı xatirələrim var. “Rabitə”də isə unudulmaz bir mövsüm keçirdim. Bu komanda ilə ölkə çempionu olduq, Çempionlar Liqasının finalında oynadıq. Çox yaxşı təcrübə qazandıq.
- O vaxt “Rabitə”yə sizi kim gətirmişdi?
- Klubun o zamankı meneceri İlqar İmamquliyev məni “Rabitə”yə çağırdı.
- Artıq Azərbaycan voleybolu əvvəlki kimi güclü deyil. Təəssüf ki, sizin çalışdırdığınız “Rabitə” də yoxdu. Belə durumun səbəbi nədi?
- Bilirəm, hər şeydən xəbərim var. Azərbaycan voleybolu çox şey itirib. Artıq əvvəlki kimi sizin liqanıza pul ayırmırlar, güclü oyunçular gətirmirlər. İstəsələr, ölkə voleybolunun keçmiş nüfuzunu qaytara bilərlər. Bunun üçün müəyyən layihələr qurulmalıdı, investisiya, pul və insanların maraq göstərməsi lazımdı. Bir mövsüm sizin ölkədə işlədim və gördüm ki, orda voleybolu çox sevirlər. Ümid edirəm ki, yenidən güclü çempionatınız olacaq.
- Azərbaycandan kimlərlə əlaqəniz var?
- Sadəcə, İlqar İmamquliyevlə əlaqəm var. Bəzən onunla danışırıq. İlqar əla insandı, ona burdan salam göndərirəm.
- Sirr deyilsə, bir mövsüm üçün “Rabitə”də nə qədər qazandız?
- Bir mövsüm üçün 130 min avro qazandım. Səhv etmirəmsə, oyunçulardan ən çox maaş alan Montana idi. Amma onun qazancını dəqiq deyə bilmərəm. Çünki voleybolçuların məvacibini bilmirdim.
- “Rabitə”də işlərin yaxşı getdiyi vaxtda niyə komandadan ayrıldız?
- “Fənərbaxça”dan yaxşı təklif aldım. Buna görə də Bakını tərk etdim.
- Azərbaycandan ayrılandan sonra yenidən ölkəmizdən təklif almısızmı?
- Heç bir təklif olmayıb.
- “Rabitə”də unuda bilmədiyiniz oyun hansı olub?
- Çempionlar Liqasında Kazan “Dinamo”su üzərindəki qələbəmiz. Məyus olduğum matç isə Bakıda həmin turnirin finalında Türkiyə “Vakıfbank”ına uduzmağımızdı. Lakin gözəl hisslər idi. “Dördlər finalı”na Azərbaycan evsahibliyi edirdi. Həqiqətən də çox yaxşı təşkilatçılıq oldu.
- Düşünürsüzmü ki, artıq Azərbaycanda bu uğurlarınız unudulub?
- Bunlar mənim vecimə deyil. Sadəcə, ömrümün sonuna kimi “Rabitə”də qazandığım uğurları xoş xatirə kimi yadımda saxlayacam.
- Ölkəmizdə hansı yerli voleybolçunu bəyənirdiz?
- Yelizaveta Rubanı deyərdim. O zaman gənc idi. İndi Rumıniyada çıxış edir. Əslən ukraynalı olsa da, voleybolun sirlərini sizin ölkədə öyrənmişdi. Çox istedadlı oyunçudu.
- Azərbaycanlı voleybolçuların əcnəbilərdən geri qalmsının səbəbi nədi?
- Düşünürəm ki, legioner oyunçuların ölkəyə gəlişi inkişaf baxımından azərbaycanlı voleybolçulara da müsbət təsir edəcək. Liqanın səviyyəsinin yüksək olmasını istəyirsizsə, əcnəbiləri ölkəyə gətirməlisiz. Lakin buna da yaxşı pul lazımdı. Məsələn, Türkiyədə italiyalı çalışdırıcılara şans verirlər və bunun həm klubda, həm də millidə nəticəsini görürlər.
CAVİD ƏLİYEV