Misli premyer-liqasında 12-ci turun oyunları keçirilir.

“Football-plus.az” xəbər verir ki, “Qarabağ” “Kəpəz”i darmadağın edib - 7:1. Matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi onun fikirləri ilə tanış edirik:

- Andrey Lunyov və Mateus Silvanın "Bayer"ə qarşı oynamaq şansı var?
- Mateus tam hazır olmayacaq. 23-lükdə yer ala bilər. Amma Lunyovun hazır olma ehtimalı çoxdu. Sabahdan komanda ilə məşqlərə başlayacaq. Görək həkimlər nə deyəcək.

- "Kəpəz" ən titullu klublarımızdandı. Onların hazırkı durumu sizə necə təsir edir?
- Turnir cədvəlinə baxanda, əlbəttə, xoş deyil. Amma futbolda belə nəticələr olur. Bundan sonra uğurlu oyun oynasalar, hər şey tam əksinə ola bilər. Azərə inanıram. Tez bir zamanda Allah qoysa, yaxşı nəticələr əldə etməsi gözlənilir. İlk matçda onlarla 1:1 oynamışdıq, "Kəpəz" "Neftçi"yə qalib gəlmişdi, "Sabah"la bərabərə qalmışdı. Çempionluq uğrunda oynayan komandalardan xal alıblar. Deməli, onların potensialı var. Uğursuzluq zolağıdı. Çıxacaqlar.

- Yassin Benzia ilk het-tririkinə imza atdı. Bu amil onun performansına necə təsir edər?
- Futbolçu nə qədər çox qol vursa, assist etsə, ona inam verir, həvəsləndirir. Bura gələnə qədər paltardəyişmə otağında onun söhbəti oldu. Futbolçular dedi ki, Benzia ilk dəfə het-tririk etdi. Mən də dedim ki, 100 manat bonus olacaq. Güldülər. Sevindirici haldı. Amma bir az çox mükafat verəcəm. Het-trik etməyin hansısa futbolçuya müsbət təsiri olur, kiməsə mənfi. Amma Benzia təcrübəlidi. Onun yaxşı formaya düşməsi üçün qolların faydası olacaq. Təbrik edirəm onu.

- Zədəliləriniz bu mövsüm daha çox olur. Bu, sizi düşündürür?
- Səbəbi yoxdu. Sadəcə yüklənmələr çoxdu. Hansısa dözür, hansısa yox. Bu mövsüm ciddi zədə Marko Veşoviçdə olub. Abbas Hüseynov ötən mövsümdən zədəli idi. Digər zədəlilərimiz qaydasına düşür. Mateus da sabahdan komandaya qoşulacaq. Fubtolun silinməyən qaydalarıdı. Ya hazırlıqsızlıqdan olur, ya da yüklənmədən. Birinciyə görə olsaydı, narahat olardım. Amma yüklənmələrdəndi. İşimizi daha da ehtiyatlı tutmalıyıq. Bəzən risklərə də gedirik.

- Qarşıda sizi "Bayer"lə oyun gözləyir. Komandadan səfərdəkindən daha yaxşısını gözləmək olar?
- Güc olaraq "Bayer" bizdən çox yuxarıdadı. Çempionat və heyəti, klub olaraq çox ciddi addımlar atıblar. Nəticəsini də görürlər. Dəfələrlə istəmişik ki, belə rəqiblərə qarşı yaxşı oynayaq. Bizim də buna şansımız var. Bakıda doğma stadionumuzda ordakı matçdan daha yaxşı oynamağa çalışacağıq. Bu cür komandalar istənilən matça nəticəni təmin etsələr də, tam ciddi yanaşırlar. Ciddi oyun gözləyir bizi. Çox istəyirik ki, bu rəqibə qarşı daha aktiv, daha yaxşı oyun göstərək. Rəqib nə qədər buna imkan verəcək, bunu da nəzərə alacağıq. İnanıram ki, oradakı oyundan daha yaxşısını Bakıda göstərəcəyik.