Asiya Futbol Konfederasiyasının Nizam-İntizam Komitəsi (NİK) “Sepahan”a sanksiya verib.

“Football-plus.az” xəbər verir ki, İran klubu Asiya Çempionlar Liqasında ləğv edilən “Əl-İttihad” ilə ev oyununa görə cəzalanıb.

İranın rəsmi IRNA xəbər agentliyinin yaydığı xəbərə görə, bu ölkənin çempionuna texniki məğlubiyyət verilib. Buna “Sepahan”ın ev oyunlarını keçirdiyi stadionda iranlı general Qasım Süleymaninin büstünün qoyulması səbəb olub. Oyun oktyabrın 2-də İsfahandakı “Nəqş-e Cahan” stadionunda keçirilməli idi. “Əl-İttihad” meydanın kənarında, hakim skamyasının arxasında qoyulmuş büstə görə oyuna çıxmaqdan imtina etmişdi.

Qeyd edək ki, 2020-ci ildə İraqda ABŞ-yə məxsus pilotsuz təyyarənin hücumu zamanı öldürülən Süleymaninin büstü 2022-ci ildə qoyulub. Səudiyyə Ərəbistanı klubunun rəhbərliyi matçdan əvvəl büstün götürülməsini istəsə də, ev sahiblərindən mənfi cavab almış, nəticədə oyun baş tutmamışdı.
NİK “Sepahan”a 200 min dollar məbləğində cərimə də kəsib. Bu da son deyil: İran klubu Çempionlar Liqasında növbəti 3 ev oyununu öz stadionunda keçirməyəcək.