"İmişli"nin "Zaqatala" üzərindəki böyükhesablı qələbəsinə Xəzər Mahmudov dublla töhfə verdi. Belədə hücumçunun oyundan sonra diqqət mərkəzində olması təbii idi. Biz də 5 qolla bombardirlər siyahısında 2-ci pilləni bölüşən Xəzərlə söhbətləşməyi lazım bildik.

- Bu gün doğma meydanda "Zaqatala" üzərində rahat qələbə qazandız, sən isə dubl etdin.
- Rahat qələbə qazandığımızı deməzdim. Rəqib ilk hissədə bizə ciddi müqavimət göstərdi. Onların da fərqlənmək şansları vardı. Yaxşı oyun sərgilədik və layiqli qələbə qazandıq. Dubl etməyimə gəlincə, hücumçuyam, işim qol vurmaqdı. Şükürlər olsun ki, bu gün həm qollar vurdum, həm də komandam qalib gəldi.

- Qarşına 1-ci liqanın bombardiri olmaq hədəfi qoymusanmı?
- Əlbəttə! Ona görə də hər oyunda irəlidə daha çox faydalı olmağa çalışıram. Amma yalnız qol vurmaqla iş bitmir. Rəqiib qapıçılarını məyus edəcəmsə, amma komandam uduzacaqsa, bunun elə də böyük faydası yoxdu. Əsas olan qolları sıralamağımla yanaşı, "İmişli"nin də uğur qazanmasıdı.

- Premyer-liqa təcrübəsi olan futbolçusan. Elitadan sonra 1-ci liqada oynamağı karyeranda eniş saymırsan?
- Xeyr, saymıram. Düzdü, premyer-liqa ilə 1-ci divizion arasında fərq böyükdü. Amma bu liqanı da çox zəif saymaq doğru deyil. Bildiyiniz kimi, bu mövsümdən 1-ci liqanın da səviyyəsi yüksəlib, çempionluğa iddialı bir neçə komanda var. Həmçinin vaxtilə güclülər dəstəsində oynayan və hazırda bu çempionatda top qovan təcrübəli oyunçular çoxdu.

- "İmişli"də elita təcrübəsi olanlarla yanaşı, potensiallı gənclər və legionerlər də var. Komandada kimlə dostluq edirsən?
- Heyətimizdəki bütün oyunçularla dostam

- Qarşıdakı oyunlar haqda nə düşünürsən?
- Hazırkı tempi saxlamaq və qələbələr qazanmaq lazımdı. Həmçinin hər oyunda özümü yaxşı tərəfdən göstərib qollar vurmaqla komandanım zəfərlərində pay sahibi olmaq istəyirəm.

- Bu il çempion ola biləcəksizmi?
- Döyüşkən heyətimiz, savadlı baş məşqçimiz var. Rəhbərlik də bacardıqca qayğımıza qalır. Ona görə də bütün rəqiblərimizi geridə qoymaqla turnirin birincisi olmaq üçün bütün gücümüzü ortaya qoyacağıq.

- Premyer-liqa matçlarını izləyirsənmi?
- Bəli. Bacardıqca bütün oyunlara baxmağa çalışıram.

- Elitanın hazırkı səviyyəsi haqda nə deyərdin?
- Ötən mövsümlə müqayisədə inkişaf gözə çarpır. Komandalar arasında hər tur gərgin mübarizənin şahidi oluruq.

- Kim çempion olmağa daha şanslıdı?
- "Qarabağ" favoritdi. Amma bu o demək deyil ki, ağdamlılar rahatlıqla çempion olacaq. Bu mövsüm çempionluğa iddialıların sayı artıb. 11 turdan sonra "Zirə" liderliyi davam etdirir. Heç kimin gözləmədiyi halda debütant "Araz-Naxçıvan" Ağdam təmsilçisi daxil, güclü rəqibləri sıradan çıxarmaqla 2-ci pilləyə yüksəldi. Odu ki, son turlara qədər çempion olmaq uğrunda intriqa izləyəcəyik.

- Elita təmsilçilərindən kimə azarkeşlik edirsən?
- Konkret fanatı olduğum komanda yoxdu. Amma "Sumqayıt"ın uğur qazanmasını istəyirəm. Həm vaxtilə o klubda oynamışam, həm də "kimyaçılar"da özümə çox yaxın saydığım futbolçular var. Ona görə də Sumqayıt təmsilçisinin uğurlarına sevinərəm.

- Qarşıda kubok oyunları da gəlir. Elita təmsilçiləriylə qarşılaşmalar sənə ayrıca motivasiya verəcəkmi?
- Düşünürəm ki, kubokda da yaxşı mübarizə aparacağıq. Özümü həm elita təmsilçilərinə qarşı, həm də premyer-liqada oynamağa hazır sayıram.

ABDULLA İSMAYILOĞLU