Misli premyer-liqasının 8-ci turunda "Qəbələ" səfərdə "Kəpəz"ə qalib gəldi - 0:1.

Oyundan sonra "qırmızı-qaralar"ın kapitanı İlkin Qırtımov "Football-plus.az"ın bəzi suallarını cavabladı.

- Mövsümdə ikinci qələbənizi Gəncə səfərində qazandız. Oyunla bağlı təəssüratların...
- Oyun çox çətin keçdi. Əslində birinci hissədə qol epizodlarından istifadə edə bilsəydik, bəlkə də bizim üçün oyun rahat olardı. Amma yenə də şükürlər olsun, cəzalandırılmadıq.

- Səncə, artıq komanda "reys"ə düşübmü? Qələbələrin davamı gələcəkmi?
- Bu qələbə bizə çox inam verəcək. Sonuncu yerdə olmağımız bizə çox təzyiq yaradırdı.

- Bu gün qələbə qazansaz da, yenə də komandada problemlər hiss olunur...
- Problemlər hər bir komandada var. Sonuncu yerlərdə olduğumuz üçün hamı gərgindi.

- Ümumiyyətlə, mövsümə uğursuz start verməyiniz səbəbi nədi?
- Uğursuzluğun səbəbi komandadan çox futbolçunun getməsidi. Hansı ki, bu uşaqlar 3 ildi birlikdə oynayırdılar. İnşallah, bir-birimizi rahat başa düşəcəyik. Bu da qələbələrə gətirib çıxardacaq.

- Növbəti tur mövsümə heç kimin gözləmədiyi qədər güclü başlayan "Səbail"lə qarşılaşacaqsız. Bu oyundakı şanslarınız nə qədərdi?
- Əlbəttə, "Səbail" çox yaxşı komandadı. Transfer etdikləri oyunçular güclüdü. Bu oyunda da əlimizdən gələni edəcəyik. Yəni çempionatda heç bir rəqibi rahat udmaq olmur. Bütün kollektivlər güclənib. Ona görə də çıxdığımız hər oyuna canımızı qoyacağıq.


CAVİD ƏLİYEV