Dünən 1-ci liqada 7-ci turun oyunları keçirildi. “İmişli” cari mövsümdə ilk dəfə doğma azarkeşləri önündə oynadı və "Zaqatala"nı darmadağın etdi. 4:0 hesablı qələbənin ardından baş məşqçi Əsgər Abdullayevlə həm oyun, həm də gələcək planlar ətrafında söhbət etdik.

- Əsgər müəllim, "Zaqatala"ya darmadağınla qalib gəldiz. Oyunla bağlı fikirləriniz maraqlıdı...
- Maraqlı və gərgin matç alındı. "Zaqatala" əzmkar, döyüşkən komandadı. Bizə ilk yarıda çətin anlar yaşatdılar. Amma şükür Allaha, oyunun gedişində tempi artırdıq və bizə lazım olan qolları vurub qələbə qazandıq. Yetirmələrimi təbrik edir, rəqibə də qarşıdakı oyunlarda uğurlar arzulayıram.

- Bu gün ilk dəfə doğma meydanda oynadız. Bunun da qələbədə rolu oldumu?
- Təbii ki, doğma publika qarşısında oynamaq əlavə üstünlükdü. Azarkeşlərin də stadiona gəlməsi bizi sevindirir. Qarşıdakı oyunlarda daha çox fanatımızın bizə dəstək vermək üçün gəlməsini istəyərdik. Bu gün tribunalara toplaşan azarkeşlərimizə minnətdarlığımı bildirirəm. Güclü 12-ci oyunçuya ehtiyacımız var.

- 7 turu arxada qoyduz, nəticələrinizə baxanda daha yaxşı ola bilərdimi, yoxsa indiki durum da normaldı?
- Elə vaxt olub ki, meydanda oyunu udmuşuq, amma nəticədə yenilmişik. Nəticələrimiz daha yaxşı ola bilərdi. Amma hazırkı vəziyyətimizdən də narazı deyiləm. Oyundan-oyuna inkişaf edirik.

- Qarşınıza çempionluq hədəfi qoymusuz. Sizcə, heyətində elita təcrübəsinə malik futbolçular olan "Şamaxı", "Karvan" "İrəvan", həmçinin iştahı artan MOİK və "Qaradağ Lökbatan" ilə rəqabətdə hədəfə çatmaq çətin olmayacaqmı?
- Asan heç nə yoxdu. Eləcə də 1-ci liqada sıradan bir rəqib yoxdu. Biz hər rəqibə hörmət edir, oyunlara ciddi hazırlaşırıq. Zəif rəqib olmur, oyuna zəif hazırlıq olur. Odu ki, hər turda maksimum nəticə üçün meydana çıxırıq.

- Noyabrın 2-də ölkə kubokunun püşkü atılacaq. Həmin turnirə də ciddi hazırlaşırsızmı?
- Zəif hazırlaşdığın oyuna çıxmaq, turnirdə iştirak etmək düzgün deyil. Biz nə zəif oynamağı, nə də turnirdə qapazaltı olmağı düşünürük. Kubok oyunlarında da döyüşəcəyik.

- İki cəbhədə savaşmaq çətin olmayacaq?
- Yuxarıda qeyd etdiyim ki, asan heç nə yoxdu. Çətinliklərə baş vurmalıyıq ki, inkişaf edək.

- Həm çempionat, həm də kubok üçün hazırkı heyət yetərlidi, yoxsa yeni transferlər olacaq?
- Mövsümə hazırlığa və oyunçu seçiminə gec başladıq. Buna rəğmən, döyüşkən futbolçuları cəlb edə bildik. Amma çatışmazlıqlar var. Odu ki, güclənməliyik. Axtarışlarımız davam edir.

- Sirr deyilsə, hansı mövqelərdə yeni nəfəsə ehtiyac var?
- Bu haqda danışmaq həm tezdi, həm də düz deyil. Ümumilikdə onu deyim ki, biz kiminsə yerinə kimisə gətirməkdə maraqlı deyilik. Mənə hər mövqe üçün rəqabət lazımdı. Ona görə əlimin altında hər mövqe üçün futbolçular lazımdı. Rəqabətin olması vacibdi və bütün futbolçular buna hazır olmalıdı.

ABDULLA İSMAYILOĞLU