“Neftçi” yeni idman direktorunu təqdim etdi – o da vaxt istədi
"Neftçi" yeni idman direktoru Yens Anderssonu ictimaiyyətə təqdim etdi.
"Football-plus.az" xəbər verir ki, təqdimat mərasimində baş icraçı direktor Fərrux Mahmudovla yanaşı, əsas komandanın baş məşqçisi Adrian Mutu da qatılıb.
Fərrux Mahmudov təyinat və əsas komandayla bağlı fikirlərini bölüşüb:
Anderssonun akademiyamızın inkişafında böyük rol oynayacağına inanırıq. Klubun bütün yaş qrupları üzrə komandalarıyla məşğul olacaq. Ümid edirik ki, zəngin təcrübəsi sayəsində oyun fəlsəfəsini yetirmələrimizə aşılaya biləcək. Adrian Mutuya və futbolçulara da güvənirik. Liderdən cəmi 5 xal geridəyik. Əsas mübarizə hələ irəlidədi. Azarkeşlər həmişə zirvədə olmağımızı istəyir. Sadəcə, bir az səbirli olmalıyıq. Nəticələr zamanla gələcək. Layiq olduğumuz yeri tutacağıq".
Yeni idman direktorunun fikirləri isə belədi:
"Bakıda və "Neftçi"də olduğum üçün məmnunam. Şəhərlə tanışlıq çox xoş oldu. Təcrübəmiz hər iki tərəf üçün faydalı olacaq. İndiyə qədər daha çox klubla tanış olmuşam. Bilirəm ki, "Neftçi" akademiyasıyla da məşğul olmalıyam. Layihəmizin uğurlu alınacağını düşünürəm. Amma bunun üçün vaxt tələb olunur. İlk növbədə Azərbaycan futbolunu tanımaq lazımdı. Yeni adlar və simalar çoxdu".
Daha sonra Fərrux Mahmudov, Yens Andersson və Adrian Mutu jurnalistlərin suallarını cavablayıb.
Qeyd edək ki, "ağ-qaralar"ın yeni funksioneri daha öncə "AİK Solna" (İsveç) (2010-13, 2014, 2018-20), "Hayduk" (Xorvatiya) (2013) "Orxus" (Danımarka) (2014-16) klublarında və İsveç yığmasında (2022-23) idman direktoru vəzifəsində çalışıb.
KƏNAN BAHADIR
Digər xəbərlər
