Misli premyer-liqasında 2-ci turdan təxirə salınmış matçda “Sumqayıt” “Sabah”ı qəbul edib - 1:0.

“Football-plus.az” xəbər verir ki, oyundan sonra “gənclik şəhəri” təmsilçisinin çalışdırıcısı Samir Abasovun mətbuat konfransı keçirilib. Sizi onun fikirləri ilə tanış edirik:

- Ötən oyunda da eyni ssenari idi. Lakin bu dəfə üstünlüyünüzü qoruyub qələbə qazandız. Fasilədə uşaqlara nə dediz?
- Ötən oyunu xatırladıq. Bu gün hesab daha fərqli ola bilərdi. Qələbə üçün şadıq. Bu oyun bizim üçün dərs olmalıdır. Qoldan sonra arxaya çəkilirik. Bunu aradan qaldıra bilsək, yaxşı olacaq.

- Qapıçı mövqeyində dəyişiklik nə ilə bağlı idi?
- Rəqibin oyununa görə oldu. Mehdi standart vəziyyətlərdə daha yaxşıdı.

- Kasimir Ninqanın oyunu sizi qane etdi?
- Düşünürəm ki, hücumun mərkəzində daha faydalı idi. Bəzi məqamlarda yoruldu. Çıxışı məni qane etdi.

- İlk dövrəyə baxanda komandanızın müdafiə planından razı qaldız?
- Müdafiə planı tək 4 oyunçudan asılı deyil. Bu söhbətləri xırdalasam, çox çəkəcək. Müdafiəni də komanda şəklində qurmaq lazımdı. 5 qol buraxmışıq və narazı olduğumu deyə bilmərəm. Fərdi səhvlər texnika ilə bağlıdı. Əsas olan komanda şəklində düzgün müdafiə olunmaqdır. Bir az vaxt lazımdı. Tək müdafiəçilərin üzərinə düşmək olmaz.

- Karyeranızda ən coşğulu dəstəyi "Sumqayıt" azarkeşlərindən görmüsüz? "Neftçi"də fanatlarla aranız elə də yaxşı deyildi...
- "Sumqayıt"da "Neftçi" azarkeşlərindən böyük dəstək görmüşəm. Fanatların içində bəziləri ola bilər ki, məni sevməsin. Amma o demək deyil ki, "Neftçi" azarkeşlərini bəyənməmişəm. Sumqayıtda yaşayıram, bura mənə doğmadı. Bu komandada işləmək rahatdı.

- "Neftçi"ni çempion etmişdiz. Yenidən iddialı komandadan olmaq istəməzsiniz?
- Olmaz, burda iddialı olaq? Əvvəli xatırlayın, bu tribunalarda azarkeş olmurdu, yavaş-yavaş artdılar. "Sumqayıt"la ikinci yerə qədər də qalxmışdıq.

- "Neftçi"nin oyununu necə dəyərləndirirsiz?
- Yenidən söhbət "Neftçi"yə gəldi. Möhtəşəm futbolçuları var. Hətta, "Qarabağ"dan daha yaxşı ola biləcək gücdədilər.