Bu gün futzal üzrə yüksək liqada millinin oyunlarıyla bağlı fasilə sona çatır. Daha dəqiq desək, 3-cü tura start verilir.

"Football-plus.az" xəbər verir ki, yeni mövsümün həyəcanı “Araz-Naxçıvan” – “Baku Fire” matçıyla qaldığı yerdən davam edəcək.

Muxtar Respublika təmsilçisi meydana liderliyini möhkəmləndirmək üçün çıxacaq. Məqsəd ən yaxın rəqibi olan bakılılarla arasındakı fərqi 2 xaldan 5-ə çatdırmaq olacaq. Vitali Borisovun komandası indiyə qədər məğlub olmayıb, ilk iki görüşdə 18 qol vurmaqla iddiasını ortaya qoyub. Bu üzdən “Baku Fire” çətin sınaq qarşısındadı. Nominal qonaqlar qalib gəlmək, lider olmaq istəyəcək. Yeri gəlmişkən, “Araz Naxçıvan”ın və millimizin üzvü Felipinyo karyerasını İndoneziyada davam etdirəcək. “Kancil”lə anlaşan hücumçu mövsümün sonuna qədər orda çıxış edəcək. Naxçıvanlıların vitse-prezidenti Mahmud Sadıqov qəzetimizə açıqlamasında futzalçının icarəyə verildiyini bildirdi: “Felipinyonun gedişi zəif çıxışıyla bağlı deyil. Ona təklif gəldi. Bizə karyerasında dəyişiklik etmək istədiyini bildirdi. Narazılıq etmədik və “Kancil”lə birmövsümlük müqavilə bağladıq. Bu müddət ərzində millimizin heyətində oynamağa davam edəcək. Felipinyoya uğurlar arzulayırıq”.

İkinci oyunda “Record club” “Neftçi” İK-nı qəbul edəcək. Hər iki tərəf mövsümə uğursuz başlayıb. Çalışacaqlar ki, mövsümdə ilk qələbəni qazanıb, aşağı pillərdən canlarını qurtarsınlar. Komandaların hədəfi yüksək olduğundan matçın gərgin keçəcəyinə şübhə yoxdu. U-19 – “Yasamal Bakı” görüşü də maraqla gözlənilir. Yığmamızın vəziyyəti ürəkaçan deyil. İlk iki oyunda 12 qol buraxan komanda buna cəmi 2 qolla cavab verib. Demək olar ki, bütün mövqelərdə çatışmazlıq hiss olunur. Nominal qonaqlarda da vəziyyət fərqli deyil. Yeni formalaşdırılan kollektivdə görüləcək çox iş var. Komandanın həm hücum, həm də müdafiə epizodlarında xeyli boşluq hiss olunur. İnsaf naminə qeyd edək ki, “Yasamal Bakı” nəticələr baxımından daha üstündü. Yenə də əsas söz meydanda deyiləcək. Qeyd edək ki, turun mərkəzi matçı, yəni “Araz-Naxçıvan” – “Baku Fire” görüşü CBC Sport-da canlı yayınlanacaq.

Araz-Naxçıvan – Baku Fire
Hakimlər: ƏLİ CƏBRAYILOV, Knyaz Əmiraslanov, Vüsal Balaşov
Hakim-inspektor: Elçin Səmədli
19 oktyabr. Bakı İdman Sarayı. Saat 14.00

Record club – Neftçi İK
Hakimlər: HİKMƏT QAFARLI, Nahid Xasıyev, Elgün Hüseynov
Hakim-inspektor: Ramiz Əsədov
19 oktyabr. Bakı İdman Sarayı. Saat 16.15

U-19 – Yasamal Bakı
Hakimlər: XƏLİL XƏLİLOV, Hidayət Feyzullayev, Anar Fərəcov
Hakim-inspektor: Füzuli Nəcəfov
19 oktyabr. Bakı İdman Sarayı. Saat 18:15
Xal durumu: Araz Naxçıvan – 6, Baku Fire – 4, Yasamal Bakı – 3, Record club, Neftçi İK, U-19 – 1.

KƏNAN BAHADIR