''Beşiktaş''ın fransalı futbolçusu Valentin Rozyenin son paylaşımı camiədə və fanatlar arasında birmənalı qarşılanmayıb.

"Football-plus.az" xəbər verir ki, 27 yaşlı sağ cinah müdafiəçisi bir müddət öncə acığa düşərək ''instaqram'' səhifəsində bütün şəkilləri silmişdi. O, ''Luqano'' ilə oyunda gördüyü qırmızı vərəqədən sonra öz fanatları tərəfindən çox ciddi qınaq obyektinə çevrilmişdi.

Bilindiyi kimi ''Beşiktaş'' həmin oyunda 2:0 öndə idi və Rozyenin qırmızı vərəqə almasından sonra İsveçrə təmsilçisi son 10 dəqiqədə 3 qol vuraraq tarixi bir geridönüşə imza atmışdı. O gündən bu yana 766 min təqibçisi olan ''instaqram'' səhifəsində heç bir şəkil olmayan Rozye dünən olduqca qəribə bir paylaşım edib. O, əynində üzərində ''8'' və ''0'' rəqəmləri olan bir gödəkçə ilə şəkil paylaşıb. Hələ ki, bunun mənası tam aydın deyil. Amma 0:8 bilindiyi kimi ''Beşiktaş'' camiəsi üçün ən ağrılı hesablardan biridi. Komanda 2007-ci ildə ÇL-in qrup mərhələsində səfərdə ''Liverpul''a məhz bu hesabla uduzaraq tarixinin ən acı məğlubiyyətini yaşamışdı.

Rozyenin paylaşımının şərh hissəsində təbii ki, hər kəs, xüsusilə də ''Qalatasaray'' və ''Fənər''lilər məhz bu oyunu xatırlamağa başlayıblar. ''Beşiktaş''lılar isə Rozyeyə etiraz edib.

Xatırladaq ki, ''Qartal''ı həftəsonu səfərdə ''Qalatasaray''a qarşı derbi gözləyir. Rozyenin o matçda Uilfrid Zahaya qarşı necə performans sərgiləyəcəyi indidən maraqla gözlənilir.

ƏLİ