Kepa “Real”da qalmağın əleyhinə deyil
Müqavilə ilə “Çelsi”yə məxsus olan və icarə əsasında “Real”ın şərəfini qoruyan Kepa Arrisabalaqa klubdakı gələcəyi barədə danışıb.
"Football-plus.az" xəbər verir ki, o, Madriddə qalmağın əleyhinə olmadığını bildirib. 29 yaşlı ispaniyalı qapıçı “Real”da parlaq oyun nümayiş etdirən yeni transfer Cud Bellingemə də tərif yağdırıb. Xatırladaq ki, 20 yaşlı ingiltərəli yarımmüdafiəçi “Kral klubu”nda keçirdiyi ilk 10 rəsmi oyunda 10 qol, 3 məhsuldar ötürmə ilə fərqlənib. Bu, hətta Kriştiano Ronaldonun da göstəricisindən yaxşıdı. Portuqaliyalı ulduz “Real”dakı ilk 10 oyununda 10 qol, 1 məhsuldar ötürməlik performans sərgiləmişdi. Arrisabalaqa bunları deyib:
“Real”dakı karyeramı davam etdirmək istərdimmi? Əlbəttə. Belə böyük klubda kim qalmaq istəməz ki?! Bellingem hazırda dünyanın ən yaxşı oyunçularından biri, bəlkə də birincisidi. İndi ondan güclü bir futbolçu görmürəm. Onun hər oyunda, hər məşqdə nəyə qadir olduğunu görürük. Ümid edirəm ki, belə də davam edəcək. Yaşına görə çox təcrübəli və konkret ideyaları olan futbolçudu. Onun oyununa təkcə vurduğu qollara görə qiymət vermək düzgün deyil. Müdafiəyə də çox yardım edir. Ümumiyyətlə, meydanda gördüyü işin və komandaya verdiyi faydanın həcmi çox böyükdü. Onu meydanın hər qarışında görmək mümkündü. Məncə, Bellingem “Real”da uzun bir dönəmə damğa vuracaq futbolçudu”.
