“Araz-Naxçıvan”ın stadion müəmması bitdi
“Araz-Naxçıvan”ın ev oyunlarını keçirməli olduğu Naxçıvan şəhər stadionu ətrafında söz-söhbət səngimək bilmir.
Muxtar Respublika təmsilçisi hələ 1-ci divizionda çempion olandan sonra məlumat yaymışdı ki, idman qurğusunda təmir-bərpa işləri başlamaq üzrədi. Lakin aylar keçməsinə baxmayaraq, nə rəsmi açıqlama verilir, nə də başqa qurumlar tərəfindən məsələyə aydınlıq gətirilir. Bu üzdən klub rəhbərliyi də vaxtaşırı medianın tənqid hədəfinə çevrilir, aylardı təkrarlanan vədlərin yerinə yetirilmədiyi yazılır. Mövzunun maraqlı tərəfi isə “Araz-Naxçıvan”ın stadionla heç bir bağının olmamasıdı. Çünki obyekt Naxçıvan Muxtar Respublikasının Həmkarlar İttifaqları Şurasına məxsusdu və bura ilə bağlı qərarları həmin qurum verir. Yeri gəlmişkən, bir neçə gün öncə qəzetimizin saytında bu məsələyə toxunmuşduq. Daha dəqiq desək, rəsmi qurumun stadionu söküb yerində park salacağını yazmışdıq. Lakin əldə etdiyimiz məlumata görə, bu plan rəhbərlik tərəfindən bəyənilməyib. Çünki bölgənin inkişafı üçün hazırlanmış çoxillik planlara şəhər stadionuyla bağlı islahat da daxildi. Nəticədə müzakirə olunan bir neçə mövzu ləğv edilib və yekun qərar verilib.
Həmin qərarlarla bağlı ətraflı məlumat almaq məqsədiylə Naxçıvan Futbol Federasiyasının sədr müavini Sakit Rzayevlə əlaqə saxladıq. O, "Football-plus.az"a açıqlamasında görüləcək işlərlə bağlı məlumat verdi:
“Bilindiyi kimi, şəhər stadionu Misli premyer-liqasıyla yanaşı, beynəlxalq yarışlarının keçirilməsinə uyğun deyildi. Artıq bu istiqamətdə yeni işlər görülür və bir neçə plan üzrə çalışmalara start verilib. İdman qurğusunun təmir-bərpası “Naxçıvan Muxtar Respublikasının sosial-iqtisadi inkişafına dair 2023-27-ci illər üçün Dövlət Proqramı”nın “Təfsilatlı Tədbirlər Planı”na daxil edilib. Bununla stadionda yeni VAR, paltardəyişmə, dopinq, hakim, canlı yayınların təşkili üçün efir və həkim otaqları tam hazır vəziyyətə gətiriləcək. Hazırda bunların çoxu yeni mebellərlə təchiz olunub və kosmetik işlər görülməkdədi. Bununla yanaşı, media nümayəndələrinin rahatlığı üçün yerlər ayrılacaq. Jurnalistlərin internetlə təmin edilməsi və qeydlər apara bilməsi üçün nə lazımdısa, ediləcək. Əsas məsələ qazonun dəyişdirilməsidi. Tezliklə meydança süni ot örtüyü ilə təchiz olunacaq. Federasiya bu işlərin görülməsi üçün əlindən gələni edir. Layihləndirmə işləri başa çatıb. Hazırda çalışmalar icra edilir”.
Sakit bəy Naxçıvanda tikiləcək daha bir stadion haqda detalları da bizimlə paylaşdı. Aydın oldu ki, “Araz-Naxçıvan” əvvəlki stadionda, sadəcə, bir-iki mövsüm oynayacaq. Daha sonra komanda ən ümasir standartlara cavab verən iritutumlu stadiona köçürüləcək:
“Plana əsasən Nazirlər Kabineti və Gənclər və İdman Nazirliyinin birgə çalışmasıyla yeni stadion qurulacaq. İdman qurğusu 20000 yerlik olacaq. Obyekt istifadəyə veriləndən sonra “Araz-Naxçıvan” ev oyunlarını, həmçinin mərhələlər adlayarsa, avrokubok matçlarını burda keçirə biləcək. Məqsədimiz Naxçıvanda futbolun təbliği və adamlarda bu sahəyə maraq yaratmaqdı. Hədəf azyaşlılar başda olmaqla, hər kəsə idmanı sevdirməkdi. Yaxın günlərdə layihələrin icrasına başlanılacaq”.
Görünür, “Araz-Naxçıvan” daha bir neçə ay, hətta bəlkə mövsümün sonuna qədər ev oyunlarını Bakıda – “Dalğa Arena”da keçirməyə davam edəcək. Hər halda, Muxtar Respublikada nəhəng layihələrin reallaşması istiqamətində işlər görülürsə, nəticənin necə olacağını gözləməyə dəyər.
KƏNAN BAHADIR
