"Naci Şensoyun futbol fəlsəfəsi sürətli, aqressiv, dinamik, baxımlı, yaradıcı hücum futbolu üzərində qurulur. Qalib ruhlu mütəxəssisdi! Rəqiblərin gücündən asılı olmayaraq, heç kimdən çəkinməz. Futbolçulara bu keyfiyyətləri aşılamağı bacarır, inandırır və arxasınca uğurlara daşıyırdı. Naci bəyin ən yüksək keyfiyyətlərindən biri özgüvəni ilə yanaşı, yerli mütəxəssislərlə çalışması, gənc istedadlara çəkinmədən heyətdə şans verməsi idi. O vaxt legioner limiti çox məhdud idi, əsas heyət böyük ölçüdə yerli futbolçulardan qurulurdu. Naci Şensoy Ramiz Məmmədov, Nadir Nəbiyev, Kənan Kərimov, Azər Məmmədov kimi futbolçularla gənclərin vəhdətini yaradırdı. Bu gün "Turan Tovuz"un baş məşqçisi Ayxan Abbasov da futbolçu karyerasının ən yaxşı dövrlərini Naci bəyin rəhbərliyi ilə keçirib. Aftandil Hacıyev, Kamran Ağayev, Ramal Hüseynov, Camal Məmmədov və başqa yerli futbolçular heyətdə çıxış edirdilər. U-21 yığmasının bir çox futbolçusu "Turan"dan idi. Asen Nikolov, Sergey Skaçenko kimi legioner futbolçularla "Turan" çempionatın liderlərindən birinə çevrilmişdi və azarkeşlər tribunaları doldurur, oyunlardan zövq alırdılar. Uşaq futboluna xüsusi diqqət yetirilirdi, Cavid Hüseynov, Elvin Məmmədov kimi yeniyetmələr 16-17 yaşlarında əsas komandaya cəlb edilirdi. "Turan"ın büdcəsi imkanlı 5-6 klubdan aşağı olsa da, klubda gözəl, mehriban atmosfer hökm sürürdü, tovuzlular hər oyuna qələbə üçün çıxırdı. Şensoyun digər önəmli üstünlüyü əla pedaqoq, psixoloq olmaqla yanaşı, müasir futbolun tələblərinə uyğun fiziki/funksional hazırlıq prosesini mükəmməl bilməsi idi. Barışmaz xarakteri, haqsızlıqla mübarizə aparması da diqqəti çəkir, futbol ictimaiyyəti arasında müsbət qarşılanırdı. Rəhbərliklə heç bir problem yaşamazdı, bütün problemlər qarşılıqlı razılıqla həll olunurdu. Bütün bunları xatırlatmaqda məqsədim var. Naci bəyin də dediyi kimi, məşqçi kimi müsbət fəaliyyəti diqqətdən kənarda qala bilməzdi və o dövrdə Azərbaycan millisini çalışdırmağa əsas namizədlərdən biri idi. Federasiya, şəxsən Ramiz Mirzəyev tərəfindən ciddi addımlar da atılmışdı. Açığı, "Turan" tərəfdarlarının sevimlisinə çevrilən Şensoyun komandadan ayrılmasını azarkeşlər istəmirdi. Naci Şensoyu biz əcnəbi saymasaq da, Karlos Alberto Torres uğursuzluğundan sonra millidə yerli mütəxəssislərdən birinin üzərində dayanılması məqsədəuyğun sayıldı. Əks halda, demək olar ki, Naci Şensoy milliyə əsas namizədlərdən biri sayılırdı. Hətta geniş futbol ictimaiyyəti bilməsə də, Şahin Diniyevin milliyə gətirilməsi ilə bağlı müzakirələrdə Şensoy yerli məşqçilərə dəstək kimi müsbət rəy verənlərdən biri olub. Bu da Şensoyun böyük ürək sahibi olmasının, səmimiliyinin göstəricisidi. Sonrakı dövrdə Naci bəy millini çalışdıra bilərdi, özü də qeyd etdiyi kimi, AFFA-da rəhbər dəyişikliyi vəziyyəti şərtləndirdi".