Misli premyer liqasının 9-cu turunda "Səbail" səfərdə "Qəbələ"yə 1:0 hesablı ilə qalib gəldi.

"Football-plus.az" xəbər verir ki, oyundan sonra "dənizçilər"in baş məşqçisi Şahin Diniyev media nümayəndələrinin önünə çıxıb. Əvvəlcə sizi mütəxəssisin fikirləri ilə tanış edirik:

- Qalib gəlsəniz də, rəqibə çox qol epizodu verdiniz. Bu sizin üçün siqnal ola bilərmi?
- Bəli, doğru vurğuladız. Boşluqlar var idi. Qəbələdə oynamaq çox çətindi. Hava şəraitinə görə futbolçular qaçmaqda çətinlik çəkirdi. Əvvəlki oyunlarda həmin boşluqlar olmayıb, bu gün varsa, demək ki, təsadüfdü. "Qəbələ"nin futbolçuları fərdi keyfiyyətlər baxımından çox güclüdü. Razıyam ki, boşluqlarımız olmamalı idi. Ancaq oldu. Səbəblərini də qeyd etdim.

- Avrokubok hədəfləriniz artırmı?
- Bu gün "Qarabağ", "Neftçi" və "Sabah"dan başqa digər komandaların hansından soruşsanız, deyəcəklər ki, məqsədimiz avrokubok deyil. Amma hamımızın məqsədi var. Biz ötən mövsümü 9-cu pillədə başa vurmuş komandayıq. Sabit komanda yaratmaq istəyiriksə, addım-addım irəliləyə bilərik. Yaxşı futbolçular gətirməklə, 1-ci, 2-ci yer uğrunda da oynaya bilərik. Amma bu, qısamüddətli olacaq, bir ildən sonra bu komanda dağılacaq. Yadınızdadı da, "Səbail" avrokuboklarda oynadı, ondan sonra isə üç il çempionatda axırıncı yeri tuturdu. Onu yaşamamaq üçün komanda yaratmaq lazımdır. Bu gün milliyə 7-8 futbolçumuz gedir. Komanda var idi, klub yox idi. Rəhbərlikdə dəyişiklik də oldu. Artıq "Səbail"də irəliləyiş var. İstəyirəm ki, stabil klub olaq. Fərqi yoxdur, mən burada oldum, ya olmadım. Klubu stabilliyə alışdırmaq lazımdı. Açıq deyirəm, bu gün rotasiya üçün əlində böyük materiallar olmalıdı. Biri olmayanda, digəri meydana çıxa bilməlidi. Məsələn, Pedro Nuno yox idi, onun əvəzinə həmin mövqedə olmayan biri oynadı. İki Pedro olsa, rotasiyaları rahat edə bilək. Kim olsa deyər ki, mən üçüncü yer üçün oynayıram. Bunu demək istəyirik. Futbolda məqsəd olmasa, oynamağa dəyməz. Dediyim sözüm tutmağa çalışıram. Ötən mövsüm dedim ki, qalacağıq liqada, qaldıq. Bildirmişdim ki, daha başqa "Səbail" olacaq, o da oldu. İndi desəm ki, üçüncü yeri istəyirik, sabah deyəcəksiz ki, "bəs yol çəkirdiz, nə oldu, çəkə bilmədiz axı"(gülür).

- İlk yarıda ən zəif oyunlarınızdan birini oynadız. Gözlənilirdi ki, əvəzetməyə gedərsiz, getmədiz. Səbəbi nə idi?
- Soruşdum ki, niyə belə oynayırıq, niyə topu saxlaya bilmirik? Hamısında qaça bilməmək problemi var idi. Təsəvvür edin, start heyətində meydana çıxanlarda ikinci nəfəs açılmaq üzrə idi. Ona görə, eyni oyunçuıları saxladım. Prosesi görərək, özümüz "Qəbələ"ni ortada qarşılamağa qərar verdik. Belə oyunda yaxşı pleymekerin olması vacib idi. Psixoloji oyun idi.

- Nəticəni əldə etmək çətindisə, onu saxlamaq da bir o qədər çətindi. Bu, sizi qorxudur?
- Bəli, qorxudur. 1-2 turdan qabaq demişdim ki, zirvəyə qalxmaq çox asandı. Hansısa gizlin yollarla qalxa bilərsən. Amma zirvədə qalmaq çox çətindi. İkinci hissədə hətta "Qəbələ" də sanki heç-heçəyə razılaşmış kimi oynayırdı. Hamı bizi artıq ciddiyə alır. Eyforiyaya qapılmamaq lazımdı. Çox çalışmalıyıq. Üçüncü turdan sonra demişdim ki, qorxmuram. Çünki bilirdim ki, oyunumuz var. Türkiyədəki hazırlıq zamanı "Konyaspor", "Sivasspor"la görüşlərdə futbolçularımı görmüşdüm. Mənə 5-6 oyun lazım idi ki, komanda relsə düşsün. Komandama inanırdım, amma bu qədər uğurlu nəticə olacağını gözləmirdim. Liderlərlə başabaş oynamağa çalışırıq. "Qarabağ"la matçda geridönüş etmək çox çətindi. Oyunumuz var. Ən pisi təsadüf qələbələrdi. Xallarımızın heç biri təsadüfi olmayıb. "Zirə"yə, "Sumqayıt"a da uduzmaya bilərdik. Amma bir şey var ki, "Qarabağ"ı da udmaya bilərdik. Futbol buna görə gözəldi ki, proqnozları sevmir.

- Rüfət Abdullazadənin vurduğu qol "Səbail"dəki gələcək çıxışına necə təsir edəcək?
- Rüfət çox tərbiyəli, yerini bilən futbolçudu. Oyunçu kimi də potensialı böyükdü. Onu da açmağa çalışıram. Gözləyirəm, hardasa "partlamalıdı". Heyəti məşqlərə görə qururam. Rüfətin geri dönüşdə problemi var. Amma futbol indi onu tələb edir ki, irəli gedirsənsə, o sürətlə də geri qayıdasan. Həmin partlayışı tezləşdirməlidi. Məşqlərdə ondan razıyam. Yaxşı futbolçu olacaq.

- "Sumqayıt"dan intizamsızlığa görə kənarlaşdırıldığı deyilirdi...
- İnanmıram. Rüfətin necə biri olduğunu anlatdım.

CAVİD ƏLİYEV