Misli premyer-liqasının 8-ci turunda “Qarabağ” “Sumqayıt”ı darmadağın edib - 5:0.

“Football-plus.az” xəbər verir ki, matçdan sonra ağdamlıların məşqçisi Elçin Rəhmanovun mətbuat konfransı keçirilib. Sizi onun fikirləri ilə tanış edirik:

- Qurban Qurbanovsuz özünüzü necə hiss etdiz? Qurban müəllim fasilədə hansı təlimatları verdi?
- Fasilədə oyundan qopmamağı, tempi axıra kimi saxlamağı tapşırdı. Qurban müəllimsiz çətin olur. Yoxluğu hiss olunurdu.

- Növbəti rəqibiniz "Hekken" son oyunda 4 qol vurdu, siz isə beş qol vurduz bu gün. Demək olar ki, onlara gözdağı verdiz?
- O haqda fikirləşmirik. Biz öz oyunumuzu yaxşılaşdırmağı düşünürük. "Hekken" oyununa ayrıca hazırlaşırıq. Cavab vermək barədə düşünmürdük. Son vaxtlarda sıx qrafikdə olurduq. Vaxtımız olacaq. Matç dördüncü gündü. Oyundan iki gün qabaq İsveçə yollanacağıq. Bizim üçün bu cür qrafik daha yaxşıdı. Komanda bərpa məşqləri edəcək. İki gün əvvəl gedəcəyik ki, uşaqlar dincəlsin. Bizim üçün müsbət haldı.

- Bədavi Hüseynovun hazırkı durumu necədi?
- "Hekken"lə görüşdə daha yaxşı Bədavi görəcəyik. Zədədən sonra oynayır. Bu gün də çox riskə atmadıq onu. Çünki "Qəbələ"də 10 nəfərlə mübarizə aparmışdıq. Onu "Hekken"lə oyuna qoruduq. Həm də altı gün ərzində daha yaxşı məşq etməsi üçün belə qərar verdik. "Hekken"lə matçda daha yaxşı fiziki durumda olacaq.

- Maksim Medvedevi bundan sonra 90 dəqiqə meydanda görəcəyik?
- Bugünkü matç onu göstərdi ki, Maksim 90 dəqiqə oynamağa hazırdı. Lazım olan anlarda bizə köməyi dəyəcək.

- Demək olar ki, artıq Andrey Lunyov əsas qapıçıdı?
- Səhv etmirəmsə, bir ilə yaxındı ki, oyun praktikası yox idi. Ona görə indi ona daha çox şans veririk. Kimin əsas heyətdə olacağı yaxın günlərdə bilinəcək. Amma son oyunlarda özünü daha yaxşı tərəfdən göstərir.

ABDULLA İSMAYILOĞLU