“Klubu 2020-ci ildə öz təşəbbüsümlə “Azad” adı ilə yaratdım. İstəyirdim ki, dünyasını dəyişmiş Azad adlı qardaşımın adına klub olsun, buna da nail oldum. Həm də araşdırdım və heç vaxt Azərbaycanda bu adda komandanın olmadığını gördüm. İki mövsüm bu adla U-15 liqasında və U-10-dan 14-ə kimi olan komandalarla isə Cəlilabad zonasında oynadıq. Sonradan gördüm ki, bu ada yad münasibət var. Bəziləri bunun şəxs adı olduğunu deyir. Mən də fikirləşdim ki, adın çox da önəmi yoxdu. Əsas odu ki, Masallını təmsil edir. Buna görə də AFFA-da rəsmi sənədlərini dəyişdirdim və “Masallı” FK adı ilə qeydiyyatdan keçirdim. Rayonumuzda “Viləş”,”Masallı” PFK kollektivləri olub. Ona görə də özümüzə uyğun bir komanda yaratmaq istədik. Heyətimizi də tam qurmuşuq. Masallının özündən və kəndindən olan uşaqlar bu komandada çıxış edəcəklər. Baş məşqçi postuna da vaxtıilə milli komandamızda və “Xəzər Lənkəran”da çıxış etmiş “C” kateqoriyalı Bəxtiyar Mehrəliyev rəhbərlik edəcək. 2020-ci ildə onunla bu layihə haqda ilk dəfə söhbət etmişdik. Əsas diqqətimiz uşaq futboluna olacaq. Çünki son illər narkomaniya baş alıb gedir. Mən də balalarımızı pis vərdişlərdən uzaq tutmaq üçün belə addım atdım. Bir masallılı kimi, vallah, “yutub”a girəndə xəcalət çəkirəm. Videolara baxanda rayon haqda narkomaniya, oğurluq, qətl hadisələri ilə rastlaşıram. Qoy bundan sonra Masallı haqda yalnız futbol və digər gözəl xəbərlər eşidilsin. Komandaya hazırda kənardan heç bir dəstək yoxdu. AFFA tərəfindən həftəlik verilən 300 manat yolxərcindən qalan pulu uşaqların arasında böləcəyik. Qurum bizi forma ilə də təmin edir. Uşaqlar sağ olsunlar ki, əməkhaqqı almadan gəlib bizdə çıxış edəcəklər. Uşaq klublarımıza daha əvvəl “Bioloji Təbabət” klinikası dəstək olurdu. Lakin indi sponsorluğu dayandırıb. U-16 liqasında çıxış edən komandamıza isə forma cəhətdən Masallıda yerləşən “Viləş Plaza” oteli kömək olur. Biz indi ianə təşkil etmişik. Aylıq kart hesabımza gələn pullarla, həmçinin rayonda yerləşən şəxsi “PlayStation” klubumdan gələn maliyyə ilə komandaya kömək oluruq. Hazırda aşağı yaş qruplarımıza uşaqları pulla götürürük. Görəndə ki, uşağın potensialı var, ancaq ailəsinin imkanı yoxdu, ondan ödəniş almırıq. Burdan gələn pulla da baş məşqçinin, köməkçisinin, müqavilə əsasında oyunlarımızı keçirdiyimiz Lənkəran Olimpiya İdman Kompleksinin və səfərə getdiyimiz zaman yol xərclərini qarşılayırıq. Bir məqamı da qeyd edim ki, Lənkəran–Astara regional Gənclər və İdman İdarəsinin rəhbəri Teymur müəllimin tapşırığı ilı bizə Lənkəran Olimpiya Kompleksində xüsüsi diqqət göstərilir. U-16 komandamız da oyunları bu arenada keçirir. Ötən il U-15 liqasına 12 minə yaxın pul xərclədim. Yəni bizim bu sahəyə həvəsimiz var. Bunları öz cibimdən vermişəm. Düzdü, kömək də olub. Amma bizə yardım edən şəxslər adlarının çəkilməsini istəməyiblər. Mən bu klubda özümü prezident kimi hiss etmirəm. Oyunlarımızda uşaqların fotolarının çəkilməsini, iştirak ərizəsinim qurulmasını, klubun rəsmi saytının işlədilməsini özüm təşkil ediərm. Vallah, oyun vaxtı top qırağa düşəndə də gedib özüm gətirirəm. Mən bunu pis bilmirəm. Çünki futbolu sevirəm. Uşaq olarkən “Viləş”in aşağı yaş komandasında qapıçı olmuşam. Bu kollektiv dağılandan sonra futbol arzularımı da yaşaya bilmədim. İdmana olan sevgim məni bu addımı atmağa məcbur edir”.